Israel sipai chuan Gaza chhim lama leiverh, tunnel pakhatah Hamas mi hren paruk ruang an chhar, heng mite hi an chhanchhuah hmain Hamas hian an that niin an tarlang. Mi tang parukte ruang hi Pathianni khan chhar a ni.
Israel prime minister Benjamin Netanyahu chuan, "Mi tang thahtute hian inremna an duh lo a ni," a ti. Israel PM chuan mi tang paruk thattu an man chhuah hma loh chuan Israel chu a chawl dawn lo tih a sawi. Hei bakah Israel chuan Hamas mi hrente chhuah an nih theih nan inremna an zawng mek tih a tarlang tel bawk.
Israel sipai thupuangtu, Rear Admiral Daniel Hagari chuan, "Kan chhut dan chuan Hamas helpawl hian kan va nangchin hma hretin rawng takin an lo that a ni" tiin mi tang parukte thih dan nia an hriat a sawi.
Hamas in an thah tak - Carmel Gat, Hersh Goldberg-Polin, Eden Yerushalmi, Alexander Lobanov, Almog Sarusi leh Ori Danino te ruang hi Rafah-a tunnel pakhatah an chhar thu leh, Israel-ah an thawn haw leh tawh tih Hagari chuan a sawi bawk.
Israel president Isaac Herzog chuan mi tang thah an nih avangin Israel mipuite rilru a na hle tih sawiin, "An chhungte chu thinlung takin ka tawrhpui a, him taka kan hruai haw theih loh avangin ngaihdam ka dil a ni" a ti. US president Joe Biden pawhin mi tang thah an nih chungchangah hian thuchhuah siamin, chanchin a hriat chuan a tihnat thu leh a thin a tirim takzet tih a sawi.
Hamas hruaitu Izzat El-Reshiq chuan mi tang thah an nihna kawngah hian Israel chuan mawh a phur niin a sawi ve thung. Israel chuan inkahhai puang tura inremna an siam duh loh avangin mi paruk thihnaah hian mawh an phur a ni, a ti.
