Israel-in Lebanon chhim lama Hezbollah helpawl an beih meknaah, heng hmuna United Nations sipai awmte chu insawn turin ngen mah se, UN sipaite chuan an awm chhunzawm zel dawn tih an sawi. Israel beihnaah UN sipai pangain hliam an tuar tawh a, he thil thleng hi ram hrang hrangten an dem hle a ni.
Israel prime minister Benjamin Netanyahu chuan Thawhṭanni khan UN sipaite chu Lebanon chhim lam, Israel ramri bula an awmna hmun aṭanga insawn turin a ngen nawn leh. Israel sipaiten UN sipai, UNIFIL tia sawite an bei nia puhna chu a pha zui bawk.
UN peacekeeping chief Jean-Pierre Lacroix chuan Israel Defence Force-ten Blue Line aṭanga inthiarfihlim turin ti mah se, UNIFIL chuan an awmna ngaiah an awm chhunzawm zel dawn a ni, a ti. UN sipaite dah chhunzawm zel an ni dawn tih hi UN secretary-general Antonio Guterres pawhin a lo sawi tawh bawk a ni.
Pathianni khan UN sipaite chuan an awmna hmun pakhat chu Israel tank-in a kap niin an puh. Mahse Israel sipaite chuan tank hian UNIFIL post aṭanga meter eng emaw zata hla a kap niin a sawi ve thung.
Netanyahu chuan UN sipaite chu tih nat an ni ve lohna turin a awmna sawn turin Israel chuan vawi eng emaw zat a ngen a ni tiin, chhuahsan hlen turin an ti lo a, Hezbollah hel an beih chhung lo inthiarfihlim turin an ngen niin a sawi. Hezbollah chuan Israel an beihnaah UNIFIL hmunte chu inphenna atan an hmang tih a tarlang.
"Israel chuan Hezbollah laka a ram venghim turin dikna a nei a, hei hi a ti zel dawn bawk," tiin Netanyahu chuan a sawi a, hemi rual hian UNIFIL sipaite ti na tel lo turin theihtawp an chhuah thu a sawi. "UNIFIL mi leh sate an himna tur ṭha ber chu Israel ngenna an ngaih pawimawh a, inbeihna hmun aṭanga lo thiarfihlim rih chu a ni," a ti.
Israel Prime Minister chuan, "Israel hian UNIFIL a bei lo a, Lebanon mipui pawh a bei hek lo. Iran-in a chawm leh a thlawp, Hezbollah a bei a,anni hian Lebanon ram aṭangin Israel hi an rawn bei a ni. Hamas ten rawng taka nikum October 7-ah Israel an beih tukah, Hezbollah hian a hrana intihbuaina engmah nei si loin Israel an rawn bei zui ve nghal bawk. Khami ni aṭang khan Israel beihna atan rocket leh missile 10,000 chuang an kap chhuak tawh a ni," tiin a sawi.
