Israel foreign minister Gideon Sa'ar chuan Ireland-in Israel huatna policy nasa taka a kalpui avangin, Ireland-a Israel embassy chu khar a ni dawn tih Pathianni khan a puang.
Ireland sorkarin Palestinian state a pawm hnu leh, International Court of Jutice-in Gaza Strip-a Israel chet dan chu 'insuatna' tia a sawi a thlawp hnuah Israel leh Ireland inkar boruak hi a ṭha lo chho leh a ni.
Kum 2023, October 7-a Hamas firfiakten Israel an beihna chhang let a, Israel-in Gaza Strip-a Hamas laka beihpui a thlak chungchang sawiseltu langsar tak zingah Ireland hi a tel a ni. International Criminal Court-in Israel prime minister, Benjamin Netanyahu man theihna, arrest warrant a tih chhuah pawh ram tam takin an pawm loh laiin, Ireland prime minister Simon Harris chuan Israel PM hi Ireland-a a zin a nih chuan an lo man nghal tur thu a sawi tawh bawk.
Ireland-in Palestinian state a pawm avangin, kumin May thla khan Israel chuan Ireland-a an ambassador pawh a lo ko kir tawh bawk a ni.
Israel foreign ministry chuan thuchhuah a siamah, Ireland chuan Israel nena inlaichinna a kalpui dawnah a tih loh tur ang a ti vek a ni tiin, Israel huatna policy an kalpui avang hian Dublin-a Isreal embassy pawh khar a ni dawn a ni, a ti.
Israel-in embassy khar a tum chu pawi a tih thu Ireland PM Harris chuan a sawi a, 'Israel hawtu leh dodaltu nia Ireland an sawi hi ka pawm lo. Ireland chu remna leh muanna duhtu, human rights vawnhimna thlawptu leh interational law zawmtu a ni," a ti ve thung.
Ireland foreign minister Michael Martin chuan Israel-a embassy chu an khar ve dawn lo tih sawiin, ram pahnihte chuan inlaichinna an la nei reng dawn tih a sawi.
Embassy khar tum hi Israel eptu pawl hruaitu leh foreign minister hlui, Yair Lapid chuan an sawisel thung. "Ireland-a Israel embassy khar tum hi Israel hotu leh dodaltu pawlten hnehna an chang tih lantirna zawk a ni. Huatna leh sawiselna hi tlanchhiatsan loin, awm luih tlata beih let zawk tur a ni," tiin X-ah a tarlang. Ireland-a Jewish Representative Council chairman, Maurice Cohen pawhin embassy khar hian Ireland-a Juda hnamte tan a ṭha dawn lo niin a sawi ve bawk.
