US President thlanna neih zawh taka Kamala Harris thlawptu, Wall Street leh America sumdawng liante chuan President-elect, Donald Trump lam an hawi leh ṭan a, inaugural committee hnenah sum an thawh tur thu an hrilh hlawm. Hei vang hian January 20, 2025-ah President atana Trump lak luhna tur puala inaugural fund siam chuan sum hmuh tam lamah recrad a siam dawn nia sawi a ni.
Kum 2017 khan Trump inaugural fund-ah USD mtd 107 hmuh niin record a siam a, mahse tun ṭumah hian a record hi a rawn khum leh dawn niin a ang.
Donor zingah hian OpenAI CEO Sam Altman, Amazon neitu Jeff Bezo, Mark Zuckerberg kaihhruai Meta te an tel a, anni pathum hian USD mtd 1 ṭheuh an thawh tur thu an lo sawi tawh a ni. Anni bakah hian Uber leh CEO Dara Khosrowshahi, motor company lian Toyota, General Motors leh Ford pawhin USD mtd 1 ṭheuh an thawh tur thu an sawi ve leh. Ford hian an motor eng emaw zat an thawh dawn nia sawi awm bawk. USD mtd 1 thawh tum hi company 11 an awm nia sawi a ni a, an zingah hian Intuit leh Pharmaceutical Research and Manufacturers of America (PhRMA) pawh an tel.
Trump inaugural fund atana USD mtd 1 chin thawhte hi President lak luh a nih hmaa hun an hman hrang hranga atan ticket paruk an dawng dawn. Cabinet atana thlante nena inkawmna hmun te, Donald leh Melania Trump-te 'candlelight dinner' leh black-tie ball ah pawh an tel thei dawn a ni.
US President inaugural fund atana sum hmuh chhuah la tam ber chu Donald Trump term hmasa zawk, 2017-a lak luhna tura USD mtd 107 an hmuh chhuah kha niin, a dawttu hi 2021-a Joe Biden lak luhna puala USD 63 an hmuh khah a ni. Barack Obama inaugural fund atan kum 2009 khan USD mtd 53 hmuh niin, 2013-ah USD mtd 42 an hmu bawk.
