Bangladesh court chuan an ram prime minister hlui Sheikh Hasina, a laizawn Sheikh Rehana bakah Britain MP Tulip Rizwana leh mi dang 50-te chu thuneihna hmang dik lo a, dik lo taka ram neia puhna kaihhnawihah Pathianni khan manna tur thupek a ti chhuak.
Dhaka Metropolitan senior special judge Zakik Hossian chuan Anti-Corruption Commission (ACC)in chargesheet hrang pathum a theh luhte a ngaihtuah hnuah, Pathianni khan arrest warrant hi a ti chhuak ta a ni.
Judge Hossain chuan manna thupek tih chhuah bawhzui a nih dan report chu April 27 a ngaihtuah turin a ti bawk.
April 10 khan court hian Hasina, a fanu Saima Wazed Putul leh mi dang 17-te chu dik lo taka ram neia puhna dangah manna tur thupek a o ti chhuak tawh bawk a ni. Putul hi kum 2023 November 1 aṭang khan New Delhi-ah World Health Organisation (WHO) South East Asian regional director in a awm a ni.
ACC hian January 13 khan Rehana hi thuneihna hmang sual a, dik lo takin Purbachal New Town Projec kaltlangin 10-katha plot neia puhin a lakah thubuai a theh lut. He thilah han Hasina leh Rehana fanu, British MP Tulip Rizwana Siddiq pawh innhnahnawiha puh an ni tel bawk. ACC hian a chhui chian hnuah March 10 khan mi 17 lakah chargesheet a theh lut leh. Chargesheet pathumna chu hemi ni vek hian theh luh belh lehin, mi 18 hming tarlan a ni leh.
Sheikh Hasina hi prime minister aṭanga paihthlak a nih hnuah, a laka lungawi lohna lantirte tih hlum tir leh, a mihring puite laka pawikhawihna rapthlak tak thlena puhna thubuai chu Bangladesh-a International Crimes Tribunal-ah theh luh a ni tawh bawk. Kum 16 zet a kaihhruai, Awamani League in thuneihna an chan hnuah nikum August 5 khan zirlai pawl kaihhruaia nawrh huaihawtna nasa tak lantir a nih hnuah PM aṭang hian paihthlak a ni. Hasina hi India ramah tlanchhe nghalin, tun thlengin a la awm a ni.
