Thailand khawpui, Bangkok-a May 28-a lirnghing vanga in chhawng sang tak sak lai chim avanga an hnathawhah fimkhur lo leh inthlahdaha puh thubuai siamsak, construction company hotu leh mi dang 17 te chu nimin khan police kutah an inpe.

Lirnghing vanga in sak lai chim hian mi 92 a delh hlum a, chin hriat loha awm an awm bawk. In chimin a delhte zawn hna hi Thawhlehni khan tih tawp a ni. Bulding thar hi State Audit Office thar tur a ni a, March 28-a Myanmar-a magnitude 7.7-a naa lir a nghin ṭum khan Thailand pawh hi a nghawng tel a, mahse he building chauh hi a chim a ni.

Italian-Thai Development Corporation Limited (ITD) president, Premchai Karnasuta hi building project-a contractor a ni. In chim vanga mi tam tak thihna thleng chungchangah Karnasuta bakah desginer leh engineer-te chu thubuai siamsak a ni tih Bangkok deputy police chief Noppasin Poonswat chuan a sawi.

Noppasin chuan building plan hian in sakna tura kaihhruaina siamte a zawm ṭha tawk lo tih finfiah a nih thu sawiin, an concrete leh thir hmante pawh danin an phut ang an pha lo a ni, a ti. Building a chim hnuah Thai media-te chuan project thawh dan hi a dik tawk loh zia an tarlang a, ṭhenkhat chuan document thlengin a felfai tawk lo tihte an tarlang.

Criminal Court chuan Ningani khan building saknaa mawhphurtu zingah mi 17 te manna tur thupek a ti chhuak a, an zinga 15 chu police station-ah an inpe nghal a, a dang pahnih pawh an inpek ve leh thuai rin a ni.

Premchai Karnasuta hi kum 2018-a Thungyai Naresuan Wildlife Sanctuary-a dan kalha ramsa a pel avang leh, ralthuam kawl phal loh a lo kawl avangin kum 2019 khan kum thum tang tura hrem a lo ni tawh bawk. Hemi ṭum a a sa pel puite nen hian black panther kap hlumin, a sa hi an ei a ni.