Calcutta High Court judge hlui, CS Karnan chu thla khat chuang zet a bikbo hnuah Thawhlehni khan Coimbatore-ah man a ni. Supreme Court chuan bail a dilna a hnawlsak nghal a, hremna a lo pek tawh chu kaltlangpui turin a ti a ni.
Kum 62 mi, Karnan hi May 9 khan Supreme Court chuan court zahloah puhin thla ruk chhung jail tang turin a lo hrem tawh a, mahse hremna tihchhuah a nih hnu hian a awmna chin hriat lohin a bibo zui a ni.
Thawhlehni khan West Bengal police team pathum chuan Karnan hi Coimbatore, Tamil Nadu-a private resort aṭangin an man a ni. West Bengal director general of police (home guards), Raj Kanojia chuan Karnan hi zan dar 7 velah an man tih a sawi. Nimin khan Chennai aṭangin Kolkatta lam panpui a ni a, Presidency Jail-ah dah luh a ni ang.
CS Karnan-a’n bail a dilna hi Justice DY Chandrachud leh Justice Sanjay Kishan Kaul awmna vacation bench chuan hnawlin, Karnan-a hnena hremna pek hi judge pasarih awmna bench thupek lo siam tawh a nih avangin an dang thei lo tih an sawi.
Karnan hi high court judge ṭanglai zinga jail tang tura hrem hmasak ber a ni. Karnan hian Supreme Court judge pasarih-te chu eiruah puhin an mahni manna tur thupekte a tichhuak a ni. Supreme Court chuan May 9-a Karnan manna tur thupek a tihchhuah hma khan a rilru lam endik turin a ti a, mahse hei hi a zawm duh lo a ni. Hemi hnua manna tur thupek tihchhuah a nih hnu hian Karnan hi Chennai-ah a tlanchhia a, umzui ni mah se an hmu zo lo a ni. Police-te hi hun eng emaw chen Chennai-ah hian an awm zui a, mahse Karnan hi an man thei lo a ni. A bikbo lai hian Karnan hi a pension zui a ni.
