Delhi-a rorellai, Aam Aadmi Party (AAP) chuan nimin khan Kashmir Valley-a Kashmiri Pandit-te thah an nih fo avanga lungawi lohna lantirin, Jantar Mantar-ah 'Jan Aakrosh Rally' an huaihawt.
Delhi chief minister Arvind Kejriwal chuan rally-ah hian thu sawiin, tun hnaia Kashmir Valley-a inthahna thleng fo avangin Kashmiri Pandit-te chu an tlanchhiat a ngaih phah a ni tiin, sorkar laipui chu pawikhawihna thleng ṭhin titawp tura ruahmanna a neihte puang turin a phut.
Arvind Kejriwal chuan Kashmiri Pandit-te chuan kum 1990 chhoa an thil tawrh ang kha an tawng leh a ni tiin, "BJP chuan Kashmir hi a enkawl zo lo, politics bawlhhlawh tak khelh dan bak an hre lo. Kahsmir chungchang hi politics khelhna atan hmang lul suh u," a ti. BJP sorkar chuan Kahsmiri Pandit-ten lungawi lohna lantir an tumte chu dan sakin, an awmna hmunah khung betin, an dikna chanvo neihte an rahbehsak a ni, tiin Kejriwal chuan a sawi.
AAP hruaitu hian Pakistan pawh na taka sawiselin, Kashmir-a firfiakte thlawpah a puh. "Pakistan chu tactic bawlhhlawh tak a hmante titawp turin ka duh a ni. Kashmir hi India ram a ni reng dawn," a ti.
May 12-a Budgam district-a Chadoora area-a a office chhunga firfiakten Rahul Bhat an kahhlum hnuah, kum 2012 aṭanga central government scheme hnuaia chhawr, Kashmiri Pandit-te chuan lungawi lohna lantirin, an awmna hmun sawnsak turin sorkar an phut. May 31 khan Kulgam district-ah zirtirtu hmeichhia chu school compound-ah firfiakten an kaphlum a, June 2 khan Kashmir-ah hnathawktu pahnih chu kahhlum an ni leh bawk.
Kejriwal chuan BJP kaihhruai sorkar laipui lakah thil pali a phut a, chungte chu - sorkar laipui chuan Kashmir buaina chinfelna tura ruahmanna a siamte chu mipui hrilh tur te, Kashmiri Pandit-te Kashmir pawn lamah hna an thawk thei lo ang tia bond a lo ziahpui tawh sut tur te, Kashmiri Pandit-te thil phut hrang hrangte tihhlawhtlin sak leh venhimna ṭha pe turtein a phut a ni.
Khawlum tak tak hnuaiah rally-ah hian tel an ṭhahnem hle a, Kashmiri Pandit-te thah an nih avanga lungawi lohna leh an tana rorelna dik an phutna thuziakte an keng a ni. Kashmir Valley-a firfiakten an thahte sunnaa tan minute hnih chhung ngawi rengin an awm bawk.
