Bihar chief minister Nitish Kumar kaihhruai, Janata Dal (United) leh Rashtriya Janata Dal (RJD) ṭangrual sorkar thara minister turin nimin khan mi 31 rinawmna thu tiamtira lakluh a ni.
Governor Phagu Chauhan chuan minister tharte hi rinawmna thu a tiam tir.
Nimina minister zinga 16 chu RJD MLA niin, JD(U) MLA 11, Congress MLA pahnih, Hindustani Awam Morcha MLA pakhat bakah independent MLA pakhat an tel bawk.
Bihar cabinet-ah hian Chief Minister tiamin minister 36 an awm thei a ni.
Nitish Kumar hian BJP nena an thawhdunna a tihtawp hnuah, RJD leh party dang nena ṭangrual sorkar, 'Mahagathbandhan' an din a ni. Ṭangrual sorkar hian MLA 163 a nei a, minister atana lakluh tel tak, indepdendent MLA Sumit Kumar Singh-a'n a thlawp ve leh tak avangin member hi 164 an nei leh ta a ni.
August 24-ah sorkar thar hi Assembly-ah fiah a ni ang.
Chief Minister Kumar chuan nimin vek khan minister-te chanpual a sem nghal. CM hian home department, general administratioin, cabinet secretariat, election bakah minister dangte hnena pek loh dang zawng a chang.
Deputy chief minister, RJD hotu Tejashwi Prasad Yadav chuan health, road contruction, urban housing and development leh rural works-te a chang bawk.
Bihar ministry tihlen hnuah cabinet minister zingah hian Muslim panga an awm. A hmaa BJP nena sorkar an siamah khan minister zingah Muslim hi pakhat chauh a awm a ni.
