Enforcement Directorate (ED) chuan Delhi sorkarin a tihtawp tawh, Excise policy kalpui danah thil fel tawk lo awm nia sawi kaihhnawihah nimin khan Delhi, Punjab leh Hyderabad-ah hmun 32 an dap leh.
Agency-in nimina an dap hi liquor distributor, company leh an thawhpuite hmun niin, mi ṭhenkhat thu an zawhfiahna aṭangin an thil chhuina atana pawimawh hriat belh thar an nei tih an sawi.
ED hian he case kaihhnawihah hian hmun 103 an dap tawh a, liquor manufacturing company Indospirit-a managing chairman Sameer Mahandru chu thla hmasa khan an lo man tawh bawk a ni.
Central Bureau of Investigation(CBI) in FIR a thehluhah, dik lo taka thiltihnaa inhnamhnawiha a puh zingah Delhi deputy chief minister Manish Sisodia pawh a tel.
Delhi lieutenant governor-in kum 2021-22-a Delhi Excise Policy kalpui danah thil dik tawk lo awm nia sawi chungchang hi CBI chhui tura an rawt hnuah central agency hian a chhui zui a ni. Excise official 11 chu suspend an ni tawh.
ED hian Delhi-a rorellai, AAP MLA Durgesh Pathak leh minister Satyendar Jain pawh thu an zawt tawh a, sumdawnglian Vijay Nair leh midang eng emaw zat chu CBI-in thu an zawt bawk a ni.
Excise Policy 2021-22 hi expert committee report behchhanin siam a ni a, nikum November 17 khan hman ṭan niin, private bidder hnenah Delhi khawpui chhunga vend 849 atan retail license pek a ni.
Delhi-a AAP sorkar chuan Excise Policy kalpui chungchangah thil fel lo a awm lo tih a sawi thung a, BJP kaihhruai sorkar laipui chuan an party beihna atan politics tenawm taka khelin, hmanruaah ED leh CBI chu a hmangah an puh. Mahse an thil chhuina leh hmun hrang hrang an dapnaah thil dik lo engmah an hmu lo a, central agency mi leh sate an hun an khawhral thlawn mai a ni, an ti.
Delhi chief minister Arvind Kejriwal chuan, "Thla thum chhungin hmun 500 chuang dapin, Manish Sisodia thiam loh chantirna tur zawngin official 300 chuangin hna an thawk a ni. Mahse engmah thil dik lo hmuh an nei lo," tiin a sawi. Party pakhat politics tenawm tak avangin officer tam takte hun khawhral sak an ni a, hetiang chuan engtin nge ramin hma a sawn theih ang, tiin a sawi.
