Sorkar laipui chuan tualchhung indona thlen mekna, Sudan rama India mi tangkhangte hruai chhuah hna, Operation Kaveri chu nimin Thawhṭanni aṭang khan a kalpui ṭan.

External affairs minister S Jaishankar chuan India mi 500 vel chuan Port Sudan an thleng tawh tih sawiin, heta aṭang hian lawng leh thlawhtheihna hmangin India rama phurh haw an ni ang. Sudan rama India mi awmte pui turin sorkar chuan theihtawp a chhuah zel tur thu a sawi bawk.

Prime minister Narendra Modi chuan Operation Kaveri hi MoS for external affairs V Muraleedharan enpuina hnuaiah kalpui a ni tih a sawi.

Sorkar chuan Port Sudan aṭanga India mite hruai chhuahna turin Navy lawnglian, INS Sumedha a tirh thu leh, Air Force C-130J pahnih pawh a ṭul huna hman theih turin Jeddah-ah a chhawp thu a lo sawi tawh a ni.

Sudan rama India mi tangkhang mek hi mi 3,000 vel an tling. Foreign ministry chuan India mi tangkhang mekte hi an vaiin him takin hruai chhuah vek a tum tih a sawi a, hruai chhuah an nihna atan hian UN, Saudi Arabia, UAE, Egypt leh US bakah ram dangte pawh an bepawp reng tih an sawi bawk.

Sorkar laipui chuan ram danga India mi tangkhangte hruai chhuah hna hi a hmain a lo kalpui fo tawh a ni. Kum 2022, February thla khan Ukraine-a India mi tangkhangte hruai chhuah hna, Operation Ganga neiin kar li chhung flight 76 hmangin mi 16,000 vel hruai haw an ni. Kum 2021, August thla khan, Operation Devi Shakti hmangin Afghanistan aṭangin India mi sing tel hruai haw an ni bawk. Covid-19 hripui leng vangin kum 2020, May 7 aṭang khan ram hrang hranga India mi tangkhangte hruai haw hna, Operation Vande Bharat kalpuiin, thla nga chhungin flight nuai 2 chuang thlawh tirin, mi vaibelchhia 1.83 vel hruai haw an lo ni tawh bawk a ni.