President Droupadi Murmu chu ni thum chhung cham turin Pathianni khan Suriname-ah a zin a, nikum July thlaa President atana lakluh a nih hnua a ram dang a tlawh ṭum khatna a ni. India leh South America ramte inlaichinna tinghet tura zin a ni a, Suriname aṭang hian Serbia ram a pan leh ang.
President Murmu hian Suriname hruaitute kawmin, India leh Suriname thawh dunna chungchang chu Suriname President Chandrikapersad Santokhi a sawipui bawk ang. A cham chhung hian India mite'n South America ram an thlen thlak kum 150 cham pha lawmna turah Chief Guest a ni nghal dawn a, he rama India mi, hnathawka awm leh India sorkar tirha hnathawka awmte a hmu dawn bawk.
Suriname hi khawvel ram dangte aiin Hindi ṭawng chawi lar kawngah a thawh hlawk hle a; World Hindi Conference, 2003 pawh Suriname khawpui, Paramaribo-ah nghah a lo ni tawh a ni. Kumin January-a Pravasi Bhartiya Divas vawi 17-na lawmnaah khan Suriname President Santokhi hi India ramah lo kalin, President Murmu nen hian an lo inkawm tawh a ni.
June ni 5, 1873 khan Suriname-a Paramaribo hmunah hian India mi hnathawk tura kal, mi 452-te chu lawngin an thleng thla a . Thlai chin leh huan enkawlna hmuna thawk tura kal an ni hlawm. Heta kalhote hi Uttar Pradesh leh Bihar mite an ni tlangpui.
President Murmu hian June 7-ah Suriname aṭangin Serbia ram a pan leh dawn a, hei hi ram pahniha hotu lu ber intlawh vawi khatna a ni tih External Affairs Ministry chuan an sawi.
Serbia President, Aleksandar Vucic bakah, Prime Minister, Ana Brnabic leh National Assembly Speaker, Vladimir Orlic-te kawmin, ram pahnihte thawh dun dan turte a sawipui bawk ang. Serbia-ah hian sumdawnna lama inhmuh khawmnaah thu a sawi ang a, Serbia rama India mi awmte nen hun an hmang dawn bawk a ni.
