Congress chuan January 4 khan AICC headquarter, New Delhi-ah meeting neiin, meeting-ah hian Manipur aṭanga Mumbai thleng fehchhuaka kal tum a nih thu an sawi. He an fehchhuah tur hi Rahul Gandhi-a'n, September 2022- January 2023 chhunga a lo kalpui tawh Bharat Jodo Yatra hming tidanglamin, Bharat Jodo Nyaya Yatra an ti a ni.

Congress general secretary, Jairam Ramesh chuan 2022 leh 2023 chhunga Bharat Jodo Yatra neih tawhin India mipuite rilru a chawh thawh nasatzia leh, India politics boruak a vawrh kan thu sawiin, tun ṭuma yatra an neih leh tur pawh hian 2024 Lok Sabha inthlanpui lo awm tur atan an mi leh sate tiphur a, party chhunga inlungrualna a thlen a beisei thu a sawi. Ramesh hian yatra an neih turah hian INDIA-a an thawhpui party-te zawng zawng pawh sawm an nih tur thu a sawi bawk.

Bharat Jodo Nyaya Yatra hi January 14-ah Imphal aṭangin ṭan a ni ang a, state 15-a district 110 an paltlang dawn a ni. Hengah hian Lok Sabha constituency 100 a awm a ni. Yatra hi ni 66 chhunga zawh hman tum a ni a, Uttar Pradesh chu kal hun chhung rei ber tura ngaih niin, ni 11 chhung hun an hmang tura ngaih a ni. Uttar Pradesh bikah hian Varanasi aṭanga bul ṭanin, Pragyaraj, Amethi, Rae Bareli, Lucknow, Bareilly, Aligarh leh Agra te kal vek tum a ni. Bharat Jodo Nyaya Yatra hi Congress president hlui, Rahul Gandhi-a'n a kaihruai dawn a, bus leh ke hmang tein hmun hrang hrang tlawh tum a ni a, kawng laka dinga mipuite nena inkawmna hun tam zawk buatsaih tum a nih thu Congress chuan an tarlang.