National Testing Agency (NTA) buatsaihah June 18-a UGC-NET exam neih chu exam neih tuk, June 19 zanah Ministry of Education chuan a cancel zui leh nghal.
Education Ministry chuan UGC-NET exam buatsaih chu a fel hlel nia a hriat avangin a cancel tih a sawi. Hei hi Universty Grants Commission (UGC) in Indian Cyber Crime Coordination Centre (I4C)-a National Cyber Crime Threat Analytics Unit aṭanga exam kalpui danah thil fel tawk lo a awm nia a lan thu an dawn vang a ni.
Ministry chuan UGC-NET June 2024 exam cancel a nih thu a puan hnuah, exam neih ṭhat leh hun tur hi puan a ni dawn tih a sawi. Exam cancel a nih chhan, thil fel tawk lo awm nia sawi chu Central Bureau of Investigation (CBI) chhui chian tura pek nghal a ni bawk.
Kuminah hian UGC-NET exam hi pen-and-paper mode hmanga neih a ni a, exam tuma inziak lut hi nuai 11 awmin, exam-naah hian candidate 9,08,580 a inlan a ni.
SC-in sorkar laipui leh NTA hriattirna pe
UGC-NET exam cancel a nih hma hian, NTA buatsaih vek undergraduate National Eligibility-cum-Entrance Test (NEET-UG) chungchangah pawh thil fel tawk lo a awm avangin buaina a lo awm tawh bawk. Question leak a awm bakah, mark pek danah thil dik tawk lo a awm nia sawiin Supreme Court-ah pawh NTA leh sorkar laipui lakah petition thehluh eng emaw zat a awm. Petition thehluttute hian NEET-UG 2024 chu cancel turin an phut bakah, Supreme Court enpuina hnuaiah thil dik tawk lo awm nia sawi chu chhui chian an phut bawk.
Supreme Court chuan nimin khan sorkar laipui leh NTA hnenah hriattirna pein, medical entrance examination neihah thil dik tawk lo awm nia sawi chungchanga an chhanna pe turin a hriattir. Justice pahnih - Vikram Nath leh SVN Bhatti awmna vacation bench chuan petition lutte hi an ngaihtuah a ni.
Eptuten sorkar beih nan an hmang
National Testing Agency (NTA) buatsaih UGC-NET leh NEET-UG exam neih zawh takah thil fel hlel awm chu eptute'n central-a BJP kaihruai sorkar beihna atan an hmang zui nghal a, Education Minister chu mawhphurhna la turin an phut bawk.
Congress party chuan prime minister Narendra Modi kaihhruai sorkar chu 'paper leak government' tiin a sawi zui a, party president Mallikarjun Kharge chuan Education Minister chu NEET paper leak a awm lo tiin a hmain a ṭang tlat a, mahse thil dik lo titu ṭhenkhat man an nih hnuah, Minister hian thil fel hlel eng emaw a awm tih a pawm ve leh chauh a ni, a ti. Sorkar laipui chu ṭhalaite hma lam hun infiamna atana hmangah an puh bawk.
Samajwadi Pzarty hruaitu, Akhilesh Yadav chuan BJP sorkar hnuaia exam buatsaihah 'paper mafia' te an inrawlh zel nia sawiin, heng thil dik lo titute hi court enpuinaa chhui chiang a, a inhnamhnawihte chu eng mi pawh ni se, na taka hrem an ni tur a ni, a ti.
Shiv Sena (Uddhav Balasaheb Thackeray) hruaitu leh Rajya Sabha MP, Priyanka Chaturvedi chuan rampum huapa exam buatsaihah thil fel lo awm fo chu NTA rintlak lohzia tilangtu a ni, tiin a sawi ve bawk. Trinamool Congress MP pawhin India ram exam kalphung chu a tlu chhe ta tiin a sawi.
