Prime minister Narendra Modi chuan Kargil War-a India-in Pakistan laka hnehna a chan champha, Kargil Vijay Diwas vawi 25 pualin Drass-a Kargil War Memorial a tlawh a, ram tana nunna hlantute zahna hlanin pangpar a dah.

Prime Miniter chuan Pakistan chungchang sawi chhuakin, hun hmasa lama India tihchhiat a tumnaah hlawhchham zel mah se heng aṭang hian engmah a inzirchhuak lo tih a sawi. Firfiak thlawptute chuan hlawhtlinna an chang ngai dawn lo a, hmelma chu an phu ang chhan letna na tak pek zel an ni ang, tiin a sawi. "Kan sipaite chuan firfiaka chetna chu na takin an chhang let zel dawn a ni," tiin, "Ladakh emaw, Jammu and Kashmir emaw pawh ni se, India chuan hma a sawnna tur dal zawnga beihna a tawhte chu a paltlang zel dawn a ni," a ti. Kum 25 liam taa Kargil-a India tana nunna hlantute chu India-in a theihnghilh ngai dawn lo a, an lakah ram pum hian bat lian tak a nei a ni, tiin a sawi.

Kum 1999, July 26 khan Indian Army chuan Ladakh-a Kargil hmuna Pakistan nena thla thum dawn an inbeihnaah hnehna an chan thu hi an puang a ni. Hemi aṭang hian July 26 hi India-in indonaa Pakistan a hnehna ni hriatrengna pualin 'Kargil Vijay Diwas' ah hman zui a ni ta bawk.

Nimina thu a sawiah PM hian BJP kaihhruai NDA sorkarin sipai lak dan scheme thar a siam, Agnipath scheme chungchang pawh sawi chhuakin, mi ṭhenkhatin security chungchang chu politics khelhna hmanruaah an hmang a ni tiin eptute a bei. Pension atana sum sen ṭhin humna tura he scheme hi siam nia an puhna pawh thu dik lo a nih tih a sawi.

'Agnipath hi sipaiah ṭhalai tam zawk an awm zel a, indona hmachhawn tura sipaite an chak reng theihna zawk tur a ni. Mahse vanduaithlak takin, hetiang thil pawimawh, national security kaihhnawih thil hi politics khelhna atante an hmang a, an mimal hlawkpuina turin dawt hmangin politics an khel a ni," a ti.

Prime Minister Modi chuan kum tam tak chhung parliament leh committee hrang hrangah sipaiah ṭhalai leh kum naupang zawk a tam thei ang an awm theih dan turte sawi ho a ni fo tawh a ni tiin, tuna India sipaite kum chawhrual chu khawvel huapa sipai kum chawhrual aiin an upa zawk a ni, tiin a sawi. Committee-in kum eng emaw zat lo chhawp chhuak tawh mah se, a hmain ngaihven a ni ngai lo tih a sawi bawk.