Prime minister Narendra Modi chuan nimin khan Palghar, Maharashtra-a Rs vbc 76,220 senga siam tur, Vadhvan Port project lungphum a phum.
Vadhvan port hi India rama deep water port lian ber zinga mi a ni dawn a, sorkar laipuiin maritime sector thuam chakna tura Sagarmala programme a duan hnuaia siam a ni dawn a ni. Maharashtra-a major port pathumna a ni dawn bawk a, Mumbai Port leh Jawaharlal Nehru port te a lo awm tawh a ni.
June thla khan union cabinet chuan port sakna tur hi an lo pawm tawh a, Modi kaihhruai NDA sorkar term thumnaa thutlukna lian tham a siam hmasak zingah a tel.
Vadhvan Port hi Mumbai aṭanga km 150 vela hla, Palghar district-a Dahanu khaw bula awm niin, international shipping route-ah direct connectivity a siam thei dawn a ni. He project thawhna atan hian Rs vbc 76,220 ruahman a ni a, hei hian a ram leina huam telin, hei bakah public-private partnerships (PPP) mode hnuaia infrastructure, terminal leh commercial infrastructure siamna tur pawh a huam tel.
Siam zawh a nih hunah Vadhvan Port hi khawvela port lian zual 10 zingah a tel pha ang. Project phase I hi kum 2029-ah zawh hman tura ruahman a ni a, a pumpuia zawh hun atan kum 2039 ruahman a ni.
Port siamna atan hian tuipuia ram hectare 1,448 l eh tuipui kam, container/cargo storage area atan km 10.14 hman a ni ang. Joint venture hnuaia siam a ni dawn a, Jawaharlal Nehru Port Authority (JNPA) chuan 74% leh Maharashtra Maritime Bond in 26% an chang dawn a ni. Container terminal pakua awmin, meter 1,000 ṭheuh a thui a ni dawn a, berth pali awmin hengte hi coastal berth, four liquid cargo berths, a Ro-Ro berth, leh Coast Guard berth te an ni ang.
