Chhatrapati Shivaji Maharaj lim tlu chhia vanga Maharashtra-a eptu ṭangrual pawl, Maha Vikas Aghadi (MVA) chuan nimin khan lungawi lohna lantirin kawng an zawh. Hei vang hian Mumbai khawpuiah pawh venhimna tih khauh a ni.

MVA hian Hutatma Chowk aṭanga Gateway of India thlengin kawng an zawh a, buaina a chhuah loh nan heng hmunah hian venhim hna thawk turte dah an ni.

Sindhudurg district-a Chhatrapati Shivaji Maharaj lim, feet 35-a sang chu August 26 khan a chim a ni. He lim hi December 4, 2023-ah prime minister Narendra Modi chuan Navy Day lawmna denchhenin ropui takin a hawng.

Shiv Sena (Uddhav Balasaheb Thakckery) hotu Uddhav Thackeray chuan BJP kaihhruai state sorkar chu Rajkot Fort bula lim tlu chhia vang hian sawiselin,"Ni hnih liamta khan mi ṭhenkhatin Chhatrapati Shivaji Maharaj tluchhe ta chu enfiahin, Raj Bhavan tuipui kam bul maia awm a nih laia Governor pawhin a la thlithlai miahloh te chu mak an ti a ni. He milim tluk chhiat chhan nia an sawi, thli in na taka a chhem vanga nia an sawi pawh chu thil mak tak a ni," a ti.

Zirtawpni liam ta khan Congress ṭhalai hruaitu leh party dang hruaitu ṭhenkhat chu PM Modi-a'n an khawpui a tlawh ṭumin, Chhatrapati Shivaji Maharaj lim chim chungchangah mipuite hnenah ngaihdam dil tura phutin nawrh an huaihawt vangin Mumbai police-te chuan an lo hreng tawh bawk.

Maharashtra chief minister Eknath Shinde chuan Chhatrapati Shivaji Maharaj lim tlu chhe ta din thar leh hna thawk tura an in peih thu leh, hemi atan hian committee pahnih din a, pakhat hian Malvan area mi lim chim dan hi an chhui nghal dawn a ni tih a sawi.

Indian Navy kaihhruainain Maharashtra sorkar chuan technical expert-te awmna joint technical committee an din tawh bawk.