Delhi khawpui boruak bawlhlhawh chuan zual lam pan zelin, kumin chhunga a vawikhatna atan Pathianni zan khan sorkar chu Graded Response Action Plan(GRAP) stage 4 hmang turin hriattir a ni. Anti-polution plan GRAP-4 hi nimin Thawhṭanni aṭang khan hman ṭan nghal a ni bawk.
Tunah hian Delhi boruak AQI ah 'severe plus' a kai tawh. System of Air Quality and Weather Forecasting and Research(SAFAR) in a tarlan danin Delhi Air Quality Index(AQI) chuan nimin zing dar 6 thleng khan 481 a kai a, boruak dinhmun tehna station hmun hrang hrang 35 dah te chuan AQI 400 chunglam kai vekin, a sanna ber Dwarka ah 499 a kai pha.
GRAP-4 hman a nih hian thiltih phal loh eng emaw zat awmin, heng zingah hian insak leh ṭhiah, vantlang hmasawnna tur hna thawh hrang hrang - highway siam, kawng siam, flyover, overbridge, power transmission leh pipeline siam te chu thawh phal loh a ni. Hengte avang hian Delhi huam chhunga hna thawh lai eng emaw zat chu chawlhsan rih a ngai dawn a ni.
Delhi ah hian GRAP-4 hman a nih chhungin lirthei BS-IV emaw diesel medium engine-hlui hmang leh bungraw phur lirthei lian tlanchhuah khap niin, truck zawng zawng leh light commercial vehicle Delhi registration ni lo chu Delhi ah hian tlan luh khap a ni a, hetih rual hian nitin mamawh phurte chu phalna pek a ni thung.
Boruak bawlhhlawh vang hian Delhi huam chhunga zirna in te chu online-a zirna kalpui tura tih an ni a, pawl 10 leh 12 erawh dan pangngaiin an kal thung ang. Public leh private office te pawh 50% chauh office-ah thawkin, a bak chu in lama thawk chhunzawm tura ngen an ni. Sorkar chuan mimal lirthei pawh an registration number odd leh even-a in tlanchhawk turin a hriattir bawk.
Chief miniser Atishi chuan nimin, Thawhṭanni khan Delhi chhunga boruak bawlhhlawh nasa zel chungchanga sorkar laipuiin hmalakna mumal a nei lo chu a sawisel. Delhi ṭhenawma kut hnathawktuten an thlai thar hnukhawi leh rote an hal dan a khuahkhirh loh avangin boruak bawlhlhawh hian zual lam a pan tih sawiin, tun kum ruk liam ta chhung khan Madhya Pradesh ah chuan thlai ro hal hi a pung nasa niin a sawi.
Supreme Court pawhin state sorkar chu AQI 400 a kai hun nghak kher loa GRAP 4 hmang turin leh court in hriattirna a tih chhuah hma chu GRAP-4 hi hmang chhunzawm turin a hriattir bawk a ni.
