Congress party hruaitu leh Lok Sabha-a Leader of Opposition, Rahul Gandhi-a'n tun hnaia buaina chhuah vanga thi chhungte tlawh tura Uttar Pradesh-a Sambhal khuaa kal a tum chu nimin khan Ghazipur border-ah police-ten an dang.
Rahul Gandhi chuan he thil thleng chungchang hi a X-ah post-in, police-ten Sambhal a kal an phalsak loh thu a sawi a, Leader of Opposition a nih anga buaina chhuahna hmuna kal chu a tih tur a nih laiin, police-te hian kaltlang an lo phalsak loh thu a sawi a ni.
"Keimah chauha kal mai pawh ka inpeih a, mahse an remti lo a ni. Hei hi ram danpui kalh a ni. Engvangin BJP chuan a hlauhthawn? An tih dik loh thupna tan police-te an hmang em ni?" tiin Gandhi chuan a sawi zui bawk.
Rahul Gandhi hi a farnu Priyanka Gandhi Vadra bakah Congress hruaitu ṭhenkhatten an zui a, zing karah Ghazipur border-ah hian police ṭhahnem takinan lo dang a ni. Congres party chuan Sambhal-a buaina thleng hi rorellai, BJP-in a ruahman lawk vek niin a puh a, kum 2027-a state assembly inthlan neih tur a nih vangin hetiang buaina pawh hi a la chhuah belh fo a rinawm thu an tarlang.
November 19, 2024 khan court thupekin Sambhal-a Mughal hun lai mosque din chu enfiah a ni. Hindu lam chuan he mosque awmnaah hian a hmain Harihar temple a ding nia sawiin court-ah hian an thlen a ni. November 24-a mosque endik ṭum hnihna neih leh niin, hemi duh loa pungkhawmte chuan Shahi Jama Masjid bulah security force-te lo dangin an intibuai zui a ni. Buaina chhuakah hian mi pali an thi a, hliam tam tak an awm bawk.
Buaina chhuak vanga Sambhal-a punkhawm khapna thupek hman chu Pathianni khan a tawp a, mahse December 31 thleng atan pawhsei a ni tawh. UP police-te chuan Delhi-Sambhal inkar hmun eng emaw zatah daidanna siamin, checkpoint tinah motor te an endik bawk. Hei hian Delhi-Noida inkarah thlengin traffic jam nasa tak a siam phah bawk a ni.
