Defence minister Rajnath Singh chuan nimin Pathianni khan ni thum chhung cham turin Russia a pan.
A cham chhung hian Indian Navy tana indo lawnglian multi-role stealth frigate, INS Tushi hlanna hun a hman pui bakah, Russia defence minister Andrey Belousov nen ram pahnihte ralthuam siamchhuah chungchang sawi dunna hun an hmang nghal ang.
Indo lawnglian, India Navy hman tura hlan chhawn tur hi khawvel huap pawha technology a sang filawr tak niin, Indian Ocean-a India Navy te hnathawh pawh nasa taka a puih theih rin a ni. Tuipui lama China beihna thleng thut thei lakah pawh a puih nasat theih hle rin a ni.
Chief of the Naval Staff Admiral Dinesh K. Tripathi chuan Liningard-a Yantra Shipyard-a indo lawng lian inhlanchawnnaa tel turin Defence Minister hi a ṭawiawm dawn a ni.
Defence Minister Singh leh Belousov te chuan Moscow-a India-Russia Inter-Governmental Commission on Military and Military Technical Cooperation (IRIGC-M&MTC) meeting vawi 21-na, December 10 a hman tur chu an kaihruai dawn a ni. Ram pahnihte thawhdunna thlirin, sipai inkar tih chak te, venhimna chungchang te, industry lama thawhdunna te an sawi dun ang.
