Maharashtra chief minister thar, Davendra Fadnavis chuan BJP kaihhruai ṭangrual sorkar, Mahayuti chuan minister-te hna thawh dan endikna, 'performance audit' a neih ṭhin tur thu a puang. Hei hi sorkar inrelbawlna kawnga rintlak leh langtlang a nih theihna tura tih a ni. Eng hunah nge audit hi neih ṭhin a nih dawn erawh a la sawichiang lo.
Deputy chief minister leh Shiv Sena hruaitu, Eknath Shinde pawhin an party minister-te chu kum hnih leh achanve chhung an hnathawhte an zirchian hnuah, a thawk ṭhate chauhin an hna hi an thawh chhunzawm theih tur thu a sawi. Deputy CM leh Nationalist Congress Party(NCP) hruaitu, Ajit Pawar pawhin kum hnih leh a chenve hnua thawk ṭha lote thlak an nih tur thu hi a thlawp thu a sawi ve bawk.
Mahayuti sorkara minister atana MLA 39-te lak luh an nih hnuah, Pathianni khan CM Fadnavis leh a deputy pahnihte hian Pathianni khan thuthar thehdarhtute an kawm a ni. Minister-te chanpual pawh hi ni hnih thum hnuah tihfel tum a nihthu an sawi.
Minister atana lakluh mi 39 zingah hian BJP chuan ṭangrual pawl zingah seat an lak hnem ber avangin minister 19 neiin, Shinde-a kaihhruai Shiv Sena leh Ajit Pawar kaihhruai NCP hian 11 leh pakua in an in sem ve thung. Mi 33 te chu cabinet minister niin a dang parukte chu minister of states an ni.
CM thar hian Mahayuti sorkar chuan Maharashtra hmasawnna tur atan chauha a thawh tur thu a sawi. Fadnavis hian a deputy te nen lungrual takin minister te performance audit neih chu an pawm tlang a ni tiin, an hmalak tum dan te hi a sawi lang a ni.
