Zonet-in kar khat dana a tihchhuah ṭhin, Rainbow Ṭhazual Fakna thar ber tihchhuahah nula pathum an chungnung a, heng nula pathumte hi fakna hla huang chhungah chuan kan nula neih ṭhat ber ber an ni bawk.
Rainbow Ṭhazual Fakna thar berah hian Bethsy, Pensy leh Temi te pathum, trio-a an sak, 'Mamawh chhanna Lal Isua' chu pakhatnaah a awm. Heng nula pathumte hian an solo video ṭheuh pawh pakhatna an nihpui thei a, an pathuma an sakho phei hi chu beisei a sang lehzual ti ila kan tisual lo hlein a rinawm.
Bethsy, Pensy leh Temi Sailo te sak 'Mamawh chhanna hi' April 25 aṭang khan Rainbow Ṭhazual Fakna chart-ah hian kan hmu ṭan a, hemi ṭum hian palina a ni. June 8-a chart tihchhuah leh khan pathumna a kai chho a, chuta ṭang chuan pahnih a rawn zuan khum a ni. A satute hi a mal ṭheuh pawha chhuanawm tak tak an ni a, tuna an hla hian pakhatna a hauh rei phian mai thei a, lo hauh rei ta viau pawh nise a âwm lo hauh loin a rinawm.
Hunrei tak music video a tihchhuah tawh loh hnu, mi tam takin zai a chawlhsan tawh mai emaw an tih tawh hnuah Betea a rawn par chhuak a, pakhatna a luah hnuah nula pathumte hmun a kian ta. Betea hi pakhatna aṭangin panganaah daih a chhuk a, a chhuk chak hle a ni.
Tunlaia fakna huang chhunga mipa kan neih ṭhat berte zinga mi TBC Zaithanpuia pahnihnaah bawk a ṭhu a, vawi hnih a ṭhutna a ni ta. May thla khan palina a ni a, June thla aṭangin hma a rawn sawn chak viau a, pakhatna a nih mai a beiseiawm viau tawh laiin, Bethsy, Pensy leh Temi te hian an rawn hmakhalh ta thung. Mahse, a satu thiam dante ngaihtuah a, a hla leh video te thlir chuan pahniha tawp mai tur hmel a pu rih lo a, hma la sawn zel turin a beisei ngam.
Pangana aṭangin One in Christ chu pathumnaah an rawn invawrh chho a, pasarihna aṭangin Hlimhlimi pawh palinaah a rawn chuang chhuak bawk. Bethsy-i solo video, Min Hmangaih si a, tih chu palina aṭangin pariatnaah ngawt a tawlh thla bawk. Rainbow Ṭhazual Fakna tharah hian lang thar leh tawlh liam ta an awm lo a, a hmasaa mite kha an la kim.
Rainbow Ṭhazual Fakna
1 Bethsy, Pensy, Temi - Mamawh chhanna Lal Isua
2 TBC-a - Min tlan ta
3 One In Christ - Ka zai anga
4 Hlimhlimi - Ka fak ang che
5 Betea - Lungchhir a sawt lo
6 Grace Lalchhanhimi - Aw ropui ber
7 Vanlalpari - I ropui nan
8 Bethsy - Min hmangaih si a
9 T Lalrinfela - Lalpa hmantlak
10 Ark of Melody - Thlarau thianghlim hruai
