Andhra Pradesh CM YS Jagan Mohan Reddy chuan Union Minister of Electronics and Information Technology Ravi Shankar Prasad hnenah lehkha thawnin an state-ah website 132 block duh a neih thu a hrilh a, heng zingah hian EA.com pawh telin online gambling vanga thil hlauhawm thleng thei laka an state humhim a duh vang niin a tarlang.

YS Jagan Mohan Reddy hian online gam­bling chhuanlama site block duh a tarlan zinga online gambling nena inkaihhnawihna nei lo EA.com a tel hian ngaihven a hlawh hle a, NDTV Gadgets 360 chuan EA.com chauh ni lo site dang online gambling nena inzawmna nei lo pawh list-ah hian a tel tih an tarlang.

State dang thlirna tlang aṭang chuan AP CM lehkha thawn hi a makin sawisel leh sawi zui hlawh viau mah se a thlirna tlang erawh a dang deuh a nih hmel. App block tura a duh zinga ṭhenkhat chu game niin ramchhung hmundangah chuan 'games of chance' ni loa 'games of skill' anga ngaihte ni hlawm mah se IT Minister hnena a lehkha thawna a inziah dan chuan AP Gambling Act, 1974 an amend-ah online gaming leh online gambling-te chu telh a ni a, online gambling phei chu dan bawhchhiatnaah an pawm a ni. He dan thar chungchangah hian September khan thupek an lo tichhuak tawh nghe nghe. 

Hetiang hi ni mah se online multiplayer game Among Us leh Fortnite ang chite chu online game tia an sawi hian a huam lo nia tarlan a ni thung. Hei hi a chhan nia lang chu heng apps ang chiah hi chuan awlsam takin gambling emaw betting emaw a awm a nih chuan a hriat theih vang a nih hmel a, mahse site block a duh ang chiahte hi chuan gambling leh betting a awm pawhin hriat a har hle niin a lehkha thawnah hian a tarlang. 

AP CM-in block a duh list-ah hian  online betting sites a tam ber a, chutihrual chuan  "fantasy sports" platform- MPL (Mobile Premier League) leh Paytm First Games-te pawh a tel. Hetihlai hian  "real money gaming" apps- Rummy leh Poker-te erawh an tel lo thung a ni.