Lersia Play-in Mizo film hrang hrang en tur min rawn chhawpchhuahsak zel a, ngaihhlut pawh an hlawh thei hle. February thla chhunga Lersia Play-in an app kaltlanga film an hralh chhuah hnem ber chu '2Wheeler Taxi Driver' a ni.
February 9-a release, '2Wheeler Taxi Driver' hi Zote Entertainment buatsaih niin, director hi Mike a ni a, assistant director Aruata Fanai leh director of photography Ruattea te an ni. He film-ah hian zaithiam lar, Vanlalhmangaiha leh Serchhip nula, Malsawmsangi te chu a changtute niin, anni bakah Maneihi Fanai, Nu Machhungi, Aaron Malsawmdawngzuala, Isaac Chawngthu leh Lalmuanpuia Renthlei te an chang bawk. He film hi darkar 2 leh minute 2-a rei niin, two wheeler taxi driver pakhat chuan a nu lakah lem changin, sorkar hnathawk anga inchhalin taxi a khalh a, hmangaih tak tawngin an inhmangaihna zinkawnga buaina an tawh chhoh dan, inbumna leh inphatsanna avanga a nun zawng zawng a lo danglam tak chungchang a ni.
Lersia Play-in film a hralh chhuah hnem pahnihna chu 'Rini leh Rina' niin, he film hi January thlaa a hralh hnem ber a lo ni tawh bawk. In-House Production kutchhuak, 'Rini leh Rina'-ah hian Drew Pachuau chu driector niin, script writer hi Samuel L Pachuau a ni. Mizo hmeichhe lemchan thiam zinga hriat hlawh ber pawl, Sangsangi bakah Francis Malsawmdawngkima,Esther Zongte leh Alli Sandra Lalrinhlui te an chang bawk.
Pathumnaah 'Thih leh Dam' awmin thla tawp lam, February 23-a release chauh ni mah se, leitu an ṭhahnem hle. He film hi B.Lalbiakvela ziak leh direct a ni a, Gilbert Colney leh Msi Chhangte chuan lead role an play a; Papuia Pachuau, Lalawma leh Laltleipui Punte chuan supporting role an rawn chang bawk. Palinaah nikum December 28-a tihchhuah, Mizo film dangdai tak mai, tradition fiction behchhana siam 'Kêimi' a la lang a, dirctor hi Christo Pa niin, a story hi Christo Pa leh Dawm Pachuau ziah a ni. February thla chhunga film hralh chhuah hnem Top 5 chu Mapuia (MJay Pictures) kutchhuak, 'Tleitiri' chuan a rawn khar a, hei pawh hi nikum December 19-a release a ni.
