Geneva, Switzerland-a neih mek 55th UN Human Rights Council session-ah Coordinating Committee on Manipur Integrity (COCOMI) thupuangtu Khuraijam Athouba chuan hmarchhak state pathum; Assam, Manipur leh Mizoram chu Myanmar aṭanga ruihhlo leh ralthuam tawlh ru ṭhinte kalkawng ber a nih thu a sawi. Athouba chuan Indo-Myanmar ramri a phui loh avanga heng thil hi thleng niin a sawi.

Athouba chuan hmarchhak state-ah Myanmar aṭanga dan loa pem lut tam tak an awm chuan an dinhmun a tiderthawng a, hmarchhak state chhungah buaina a chawkchhuak niin a sawi. Dan loa pem lut an tam avang hian hmarchhak state zinga chi leh chi inkara remna awm ṭhin chu a buai phah a, pem lutte hian dan phal loh thil tam tak an ti ṭhin niin a sawi a, chung zingah chuan reserved forest-a dan loa chettlatna pawh a tel niin a tarlang.

Hmarchhak state chu ruihhlo leh ralthuama sumdawnna kalkawng pawimawh tak pakhat a nih tawh thu sawiin, tun hnaiah ralthuam leh ruihhlo man pawh a pung hle a ni, a ti. Myanmar aṭanga rawn kal ruihhlo leh ralthuam ṭhahnem tak Assam, Mizoram leh Manipur-ah te man a nih ṭhin thu a sawi bawk. Manipur-ah dan loa pem lutte chuan poppy chinna hmun an siam ṭhin thu sawiin, ram acre 18,000 laia zau poppy chinna hmun an tihchhiat tawh thu a sawi bawk.

Khuraijam Athouba chuan UN chu ram leilung fate dikna chanvo humhimsak turin a ngen a, chutiang a nih theih nan chuan ruihhlo leh ralthuam tawlh ru ṭhinte ven kawnga hmalakpui turin a sawm. COCOMI thupuangtu hi UNHRC session neih mekah hian vawi thum thu a sawina a ni tawh a ni. Session hi 26 February-a ṭan niin April 5 thleng neih a ni ang.