Manipur buaina chinfel dan awmchhun nia an hriat angin Kuki-Zo hnamte chuan rorelna hran siamsak an ngiat chhunzawm zel a, kar liam ta Inrinni khan Delhi-a Jantar Mantar-ah Kuki Inpi Manipur (KIM) leh Kuki Students' Organisation (KSO) huaihawtin rorelna hran ngiatin nawrh an huaihawt.

Kuki-Zo hnamte hian an chenna hmun tur sahthlak sak turin sorkar laipui an ngen a, Delhi mai bakah Manipur-ah pawh nawrh hi huaihawt a ni bawk. Hill district hrang hrang - Jiribam, Tamenglong leh Churachandpur-ah rorelna hran ngiat mipuite an pungkhawm a, Manipur sorkar Biren Singh kaihhruai an rin tawk loh thu an tarlang tel bawk.

Manipur buaina chinfel dan awmchhun chu rorelna hran siamsak an nih thu an tarlang a, "Manipur-a remna a awm theih nan, kan chunnu India hian nau thar, a hming atan Kukiland tih a hrin chhuah a ngai a ni" tiin an ziak. Manipur-a nawrh huaihawtnaah hian mipui pungkhawm an ṭhahnem hle a, a bikin National Highway 37 (Lhangnom - Tatbung) leh Tuibong, Churachandpur-ahte Kukiland ngiata pungkhawm an tam hle.

KIM leh KSO ṭangkawpin August 31, Inrinni khan Jantar Mantar, New Delhi-ah rorelna hran ngiatin nawrh an huaihawt ve bawk. Kuki pawl hrang hrang chuan Union Territory- Legislature awm telna pe turin sorkar laipui an ngen a, hemi bakah hian N Biren Singh kaihhruai BJP sorkar hnuaiah Kuki-Zo hnamte suatna kalpui a ni tiin lungawi lohna an lantir bawk.

Kuki-Zo hnamten rorelna hran an ngiat duh lohna lantir nan Imphal phairuama dawr leh sumdawnna hmunte chu Inrinni khan khar an ni ve bawk. Mipui khawlaia teivak an tlem hle a, buaina chhuak palh thei laka inven nan venhimna tih khauh belh a ni.