Catalonia regional government chuan Spain aṭanga Catalonia indan thu chu ni reilote hnuah an puang dawn tih a sawi.
BBC in kawmnaah, Catalonia President Carles Puigdemont chuan tunkar tawp lam emaw, kar leh tir lamah emaw hma an la ṭan dawn tih a sawi bawk.
Pathianni khan Catalonia bial mipuite chuan independence an duh leh duh loh chungchangah vote an thlak a, a tam berin Spain aṭanga indan hi an duh a, vote tlak result hi offiicial-a tihchhuah la ni lo mah se, 90% velin independence hi an thlawp nia sawi a ni.
Spain Constitutional Court chuan vote lak tur hi ram danpui kalh a ni tiin a hnawlsak a, Spain sorkar chuan vote thlak ni hian vote thlak turte dang turin police ṭhahnem tak a tir lut a, polling station te an kharsak bakah vote thlakna hmanrua tam tham tak an mansak bawk.
Vote thlak ni hian vote thlak tura kalte leh police-te nasa takin an innawr buai a, voter tam takin hliam an tuar. Catalan hruaitute chuan police-te chetdan an dem thu an sawi a, police te chetdan duh lohna lantirin Thawhlehni khan Catalonia bial chhung hmun hrang hrangah rally huaihawt a ni. Barcelona khawpuia kawngzawhnaah phei chuan mi 700,000 vel an tel nia sawi a ni.
Catalan hruaitute chuan official result tihchhuah kim a nih hunah Spain aṭanga independence hi an puan dawn thu an sawi. Puigdemont chuan independence an puan hnua Spain sorkar rawn inrawlh a, Catalonia sorkar thuneihna khuahkhih sak an tum anih chuan a tisual dawn hle tih sawiin, hei hian thil engkim a thlak danglam vek dawn niin na sawi bawk a ni.
