Hindu sakhaw pawl, Dera Sacha Sauda hotu Gurmeet Ram Rahim Singh-a'n fa tana a lak, Honeypreet Insan-i chu hun eng emaw chen man tuma zawn a nih hnuin Thawhlehni khan Punjab-ah man a ni.
Dera hotu Ram Rahim Singh hi amah zuitu hmeichhe pahnih pawngsuala puhna thubuaiah thiam loh chantir niin kum 20 tang tura hrem a ni a, thla hmasa khan Haryana-a Rohtak jail-ah dah luh a ni. Dera hotu man a nih avang hian a zuitute chuan lungawi lohna lantirin, tharum thawhna nasa tak an thlen a, buaina chhuakah hian mi 41 thiin mi tam takin hliam an tuar a ni.
Ram Rahim-a man a nih hnu hian a rinrawl ber pakhat, Honeypreet-i hi a bibo zui nghal a, police-te chuan thla khat chuang zet man tumin an zawng hman a ni.
Police-te chuan Honeypreet-i, a hming tak Priyanka Tanjea-i hi Thawhlehni khan hmeichhe pakhat nen Zikarpur-Patiala highway-a SUV-a an chuang lai an man a ni. August 25-a Dera zuituten buaina an chawkchhuah kaihhnawihah police-te chuan thu an zawtfiah nghal a, darkar li leh a chanve vel zet thu zawh a ni. Nimin khan local court-ah hruai a ni bawk.
Kum 36 mi, Honeypreet-i hi Panchkula aṭanga Rohtak jail-a Dera hotu hruai a nih aṭang khan chin hriat lohin a bo nghal a, Ram Rahim-a tlanchhuah dan tur ruahman leh, Dera hoten buaina an chawhchhuaha mawhphurtua puh a ni. Honeypreet-i hian social media lamah 'Papa's Angel' tiin a indah a, follower pawh a ngah hle.
Honeypreet-i chuan an puhna hrang hrangte chu thu dik lo a nih thu a sawi a, Ram Rahim nena an inkar chungchang an sawidan pawh thu dik lo a ni tih a sawi. Dik lo taka a pa nena an chungchang thehdarh a ni chuan a rilru a tihnat thu a sawi.
