Calcutta High Court chuan kum 2010 aṭanga West Bengal-a hnam eng emaw zat hnena Other Backward Class (OBC) status pek chu a tihtawpsak a, hei hian mi nuai nga vel a nghawng dawn.

Nilaini khan court chuan thupek tichhuakin, West Bengal-a service leh post-ah OBC-a tel hnam tana reservation siam chu dan kalh a ni a ti a; mahse, kum 2010 hma lama OBC certificate hmanga hna lo hmu tawhte erawh chu thupek hian a huam tel dawn lo tih a sawi nghal bawk.

West Bengal Backward Classes (Other than Scheduled Castes and Scheduled Tribes) (Reservation of Vacancies in Services and Posts) Act, 2012 hnuaia OBC status pek chungchang Justice Tapabrata Chakraborty leh Rajasekhar Mantha ṭhut Division Bench chuan ngaihtuahin, thutlukna an siam a ni. Division Bench chuan he Act-a dan ṭhenkhat chu a paih a, chung zingah chuan sub-classified category-te tana reservation 10% leh 7% pekna pawh a tel. Sub-classified category OBC-A leh OBC-B te pawh paih a ni bawk.

Kum 2010-ah khan West Bengal-ah hian Left Front an sorkar a, Mamata Banerjee kaihhruai Trinamool Congress chuan kum 2011 aṭang khan sorkarna an chelh chho ve bawk. Tuna OBC tihtawp tak zawng zawng deuthaw chu TMC sorkar hnua pekte an ni.

Chief minister Mamata Banerjee chuan, court thupek chu a pawm loh thu sawiin, a ṭul a nih chuan court sang zawkah a thlen tur thu a sawi a, "Reservation system hi kan chhunzawm zel dawn," a ti.