BJP kaihhruai National Democratic Alliance (NDA) MP thlan tharte chuan nimin khan lungrual takin parliamentary party leader atan Narendra Modi an pawm. Parliament Central Hall-a high-profile meeting-ah Modi chu Prime Minister atan an thlawp thu an sawi bawk.

Nimina meeting neihah hian thu sawiin, NDA chu party hrang hrangte'n thuneihna an chan theihna atana intelkhawm an ni ringawt lo a, ram hmasawnna duhtu, ram dah pawimawh hmasa bertu thawk ho an ni tih a sawi. "India chanchina NDA hi tangrual pawl hlawhtling ber a ni," a ti.

Modi chuan kum 10 lo awm tura an hmathlir te sawiin, sorkar ṭha hmasawnna leh mipuite khawsak phung tibuai lo tura a tlem thei anga bera inrawlhte a ni tih a sawi.

Meeting-a hian NDA hnuaia BJP thawhpui, JDU hruaitu Nitish Kumar, TDP hotu N Chandrababu Naidu, JD(S) hruaitu HD Kumaswamy, Jana Sena Party founder Pawan Kalyan, NCP chief Ajit Pawar leh Lok Jansakhti Party (Ram Vilas) leader Chiraq Paswan-te pawh an tel.

Nitish Kumar chuan Prime Minister atan Modi a thlawp thu a sawi a, "Hmathlir nei ṭha leh thawk ṭha tak a ni. Dik takin a policy zawng zawng pawh a thawk a ni. India hian a hruaitu tur dik tak - Narendra Modi a nei a ni," a ti.

Meeting zawh hnu hian NDA chuan sorkarna an siam theih thu sawiin, NDA-a tel zawng zawngte chuan Prime Minister thar atana Modi an thlawp thu President Droupadi Murmu hnenah an thehlut nghal bawk.

A term thumna atana India Prime Minister atan Modi hi lak luh a ni dawn a, June 9, Pathianni hian rinawmna thu tiamtir lak luh a ni dawn nia sawi a ni. Rashtrapati Bhavan-a Prime Minister lak luh inkhawmah hian Central Vista Project hnuaia hna thawktu hrang hrangte chu tel tura sawm an ni a, anni bakah Vande Bharat leh Metro train-a thawktu te, central sorkar scheme beneficiary hrang hrangte pawh sawm an ni bawk. Lakluh inkhawma tel tur hian mi 8,000 chuang tel tur ruahman a ni.