Afghanistan khawpui, Kabul-a parliament building bulah nimin khan thihchilh bomb a puak a, civil mi 21 in hliam an tuar. Pawikhawihtute hi Tabilan firfiakte nia hriat an ni.

Kabul police thupuangtu, Ebadullah Karimi chuan thihchilh bomb paitu hian a bomb pai hi a tihpuah hnuah, a thurualpui midangte chu Parliament-ah hian luh an tum a, mahse security force-te chuan lo dangin firfiak pasarih an kaphlum tiin a sawi. House chhunga roreltute leh staff member awmte chu security force-te venna hnuaiah chhuahtir vek an ni.

Interior ministry thupuangtu, Sediq Sediqqi chuan Parliament House beihnaa hliam tuar zingah hian hmeichhia panga an tel thu a sawi a, MP zingah erawh hliam tuar an awm lo tiin a sawi.

Pawikhawihna a thlen hnu hian Afghan Taliban thupangtu, Zabihullah Mujahid chuan media mite hnenah thu thawnin, Parliament beitute an ni tih a hrilh. Mujahid chuan Parliament-ah hian hun pawimawh tak, defence minister lakluh hun hman a nih dawn avangin he hun hman laia bei tur hian ruahmanna an siam lawk vek tih a sawi.

Taliban firfiakte hian Inrinni khan Dast-e-Archi district an la a, hemi hma hian Chardara district an lo la tawh bawk. Firfiakte hian April thla khan ram lak tumin beihpui an thlak ṭan leh a, hei vang hian Afghanistan ramah hian tharum thawhna a hluar hle. Hetihlai hian firfiakte beihna kawnga Afghanistan security force-te pui tura dah, ramdang sipai zinga a tam zawk chu nikum khan lakchhuah an ni.

Kum 13 ramdang sipaite'n an puih hnuah, kumin aṭang hian Afghan security force-te hian ramdangte puihna tel loin Taliban-te hi an bei let a ni. Mahse ramdang sipaite lakchhuah an nih hnu hian firfiakte hian province pawimawh tak tak an bei fo tawh a, ram pawh an lak belh zel a ni.