Pathiannia International Yoga Day vawikhatna hmannaah khan Vice President Hamid Ansari a tel lo a, hei hi BJP hruaitu hlun leh RSS hotu, Ram Madhav chuan na takin a sawisel zui.
Madhav hian a twitter-ah Yoga Day hmannaah Vice President tel loh chhan chu a zawt vel a, a hnuah VP chu a dam loh vanga tel lo a nih tih a sawi leh.
Mahse Vice President office chuan Madhav-a thusawi chu thu dik lo a nih thu a sawi. "Vice President hi a damlo a ni lo. Yoga program hmannaah hian tel tura sawm a ni lo," a ti. Vice President hi minister-te'n tel tura an sawmna program-ah chauh a tel ṭhin thu a tarlang bawk.
BJP hruaitu Madhav hian public service broadcaster, Rajya Sabha TV chu Yoga Day nia hun hman dante tichhuak duh loha a puh bawk. Mahse hei hi Rajya Sabha TV CEO, Gurdeep Singh Sappal chuan a chhang let nghal a, "Hei hi thu belhchian dawl lo a ni. RSTV hian Rajpath-a hun hmante live-a a tihchhuah mai bakah, yoga chungchang bikah hian documentary 3 leh special report 1 a tichhuak bawk a ni," a ti.
Rajpath-a Yoga Day hmannaa Vice President sawm a nih loh chungchangah sorkar laipui chu a insawifiah nghal. He hmunah hian Prime Minister chu chief guest a nih vangin sorkar kalphungah chuan vice president hi sawm theih a ni lo, a ti. Union Minister Shripad Naik chuan, "PM chief guest a nihnaah chuan ram danpui hnuaia amah aia sang zawk, vice president lo sawm chu thil tihawm lo tak a ni," a ti.
Vice President Ansari chuan Rajpath-a tel tura sawm ni se chuan a tel ngei tur thu a sawi a, amah pawhin yoga hi a practice fo niin a sawi. A buaipuitu ministry hian Yoga Day hmannaa tel tur hian a sawm thei a, mahse tun ṭumah hian a sawm lo a ni.
