Tun lai Mizo band ngaihven hlawh ber zinga mi, The Radio leh Mizo rimawi khawvela hming langsar, Saiwanah te hla, 'Lam dun ila' chu beisei ang ngeiin Khiangte Construction Ṭhazual Lengzem chart-ah No 1 a rawn ni ta.

'Lam dun ila ( I thiam ber dan khan)' official music video hi September 26, 2024-a an tih chhuah kha niin, million view a nei tling tawh a ni. He hla hi The Radio band vocalist/guitarist Philip Lalremruata leh Saiwanah Sailo te phuah niin, music leh recording hi Smiley Records ah an ti a, video hi Osiama Pictures siam a ni thung.

The Radio band hian rual u zawkte rilrem tur, tunlai tak si hmangin hla an rawn siam fo a, ṭhalai leh rual u lam lawm pawh an hlawh chho hle. Saiwanah pawh Zoram dengchhuak hla eng emaw zat rawn phuah chhuak thei a ni bawk a, an thawk ho fuh hle. A hla a mawiin an zaithiam a, music video pawh thlir a nuam, dance move pawh a fuh thei hle.

Hun rei tak an thawm a reh hnua 'Luahloh zun' hmanga min rawn awi thar lehtu, Blue Corn hla thar chu No 2-ah a rawn lang. An la zaithiam em em a, an hla a nalh a, an hmuhnawm leh hle. Kum 10 hma lama an laka lo luangliam ṭhinte lung pawh an ti leng thar viau ang.

Zaii Haichhum 'Thawnthu hlui' chu No 3-ah awmin, he hla hi 'Sual Inthup' film OST a ni a, he film-ah hian Zaii pawh hi a chang ve nghe nghe. Ṭhazual Award 2024-a Best pop artist award dawngtu, Mendal chuan 'I hai der em ni' tih hla chu No 4-ah a lanpui a, Latei hringen 'Par ang' tih chuan Top 5 a rawn khar.

Ṭhazual Lengzem chart tharah hian Smiley x Hex Da Marshll, Rosalind Khawlhring leh Saka te an lang chhunzawm a, Mary Dawngi leh Luv Band an rawn lang thar ve bawk.