Health & Family Welfare (HFW) minister Dr R Lalthangliana chuan, Mizoramah Covid-19 vei an tam avangin total lockdown kalpui loh theih loh niin a sawi a; Assam mite'n kawngpui an dan avangin damdawi lam hmanraw ṭhahnem tak Guwahati-ah a tangkhang tih a sawi bawk.

HFW Minister hian nimin khan Secretariat conference hall-ah thuthar thehdarhtute a kâwm a; Mizoram chu hmarchhak state zingah Covid-19 vanga thi tlemna ber a nih thu sawiin, "Mizoramah nunna chán 151 an awm a, hei hi Covid-19 do kawnga kohhran, LC/VC leh YMA thawhrim rah a ni a, theihtawpin sorkar leh mipui kan ṭanrual avangin nunna chán kan tlem phah a ni," a ti.

Health Minister tarlan danin, hmarchhak state zingah Covid-19 vanga thi Assam-ah tam berin mi 5,725 an tling tawh a; Manipur-ah mi 1,566, Maghalaya-ah mi 1,096, Tripura-ah 752, Nagaland-ah 570, Sikkim-ah 345, Arunachal Pradesh-ah 231 leh Mizoramah nimin thlengin mi 151 an thi tawh.

Mizoramah Covid-19 vei enkawl lai mi 12,182 an awm a, chu'ng zinga 9,420 chu Aizawl district-a mi an ni. State Referral Hospital (ZMC)-ah dinhmun ṭha vak loa ngaih mi 7/8 vel ICU-ah enkawl mek an awm.

Total lockdown chungchang sawiin Dr R Lalthangliana chuan, "Lockdown kan kalpui hi loh theih loh a ni. Mi rethei, ni tin inhlawhfa pawh kan hre reng a, chuti chung chuan lockdown hi kalpui loh theih a ni lo. Kan inthlahdul chuan hri kan kai ang a, kan thi ṭeuh ang tih kan hlau a ni," a ti.

Minister sawi danin, Covid-19 vei damlote enkawlna SRH-ZMC-ah khum a khah vek avangin Dedicated covid health centre (DCHC) atan Rajiv Gandhi Stadium buatsaih niin, mi 150 enkawl theihna tur siam zawh a ni tawh a, Pachhunga University College aṭangin thîr khum 150 hawh a ni. DCHC turin Kulikawn Hospital chu buatsaih niin, damlo enkawl mekte chu sawn chhuah tum a ni a; MRB Head Office, mi 50 awm theihna chu DCHC atan hman mek a ni bawk.

Health Minister chuan, Assam hoin Mizoram pawhtu kawngpui an dan avangin damdawi lam hmanrua ṭhahnem tak Guwahati-ah a tàn mek thu a sawi a, "Assam police-te chuan Mizoramah bungrua reng reng in thawn tur a ni lo, tiin transporter-te an vau a, hei hi ná ka ti hle. Union Home minister hnenah lehkha ka thawn a, a copy pawh Union Health Minister leh Assam Health Minister ka thawn bawk," a ti.

Press conference-a Health Minister ṭawiawmtu IPR minister Lalruatkima chuan, Covid-19 avangin sorkarin lockdown a kalpui rei tawh hle tih sawiin, "Mipui lamah nasa takin harsatna a awm tih kan hria. Mahse, hei hi Covid darh zel tur vênna pakhat a ni a, keimahni ringawt ni loin, mi dang inkai chhàwnna tur venna chi khat a ni," a ti.

Lalruatkima chuan, Covid-19 donaah mipui, kohhran leh pawl hrang hrangin sorkar an ṭawiawm ṭhat thu te, hripui léng thawh thumna thlen hmaa lo inrin a, nasa taka hmalak a ngaih thute a sawi bawk.

Medical Operation Team on Covid-19 (MOT) chairman Dr ZR Thiamsanga, MLA chuan, sorkarin tih fuh loh tam tak a nei thei tih sawiin, "Doctor leh thawktu dangte pawhin tihsual kan nei ve thei. Chutih karah Mizoram tluka thawhhona ṭha India ramah a awm lo," a ti a; Study Team-in veng 14-ah hripui vei mi 2,000 chuang an kâwm a, chutah chuan inkai chhàwnna tam ber chu hmai tuam ṭhat loh vang te, inhnaiha awm vangte a nih thu a sawi.

Covid-19 thupuangtu Dr Pachuau Lalmalsawma chuan, Covid-19 vei zingah state páwn aṭanga rawn lut 1.06% chauh a nih tawh thu sawiin, "A bak 98% chuang chu tualchhunga inkai chhâwn a ni a, 99.27% chu civil mite an ni," a ti.

Dr Pachuau Lalmalsawma sawi danin, Covid-19 vei zingah kum 10 hnuai lam 3,078 (16.78%) an awm a, kum 11-20 inkar 3,720 (20.49%) leh kum 21-50 inkar mi 9,022 an awm a ni.

National Health Mission director Dr Eric Zomawia chuan, Mizoram chu India ramah Covid-19 vei tam lamah pasarihna a nih mek thu a sawi a, "Vaccine pek tam theih loh chhan chu positive tam tak chawlhkar 12 rala pek theih chauh a nih vang a ni. Vaccine hi lo thleng tur nen chuan a tam tâwk a ni," a ti a; kum 18 hnuai lamte pek leh pek loh chu mithiamte'n an zirchian mek thu a sawi.