Hliam ngah Police fiahin an awm dawn

Zote Toyota MPL10-ah semifinal inchuh boruak a nung chho a, Mizoram Police pawh an him ta lo. Lalbiaksanga Colney hote hian vawiin tlai dar 2:00 hian Electric Veng FC an hmachhawn dawn a, Police-in hliam an ngah avangin point thum a hmin sa lo.

Team pahnih hi an intawn hmasak ṭumin Police 3-1 in an chak a; F. Lalnuntluanga, Malsawmfela leh Lalfakzuala ten goal an khung. Tun ṭumah hian Sawmfela hi a inhliam vangin a khelh theih a rinawm lo a, a lut a nih pawhin bench aṭangin a luh a rinawm zawk.

Tlarhnung lamah Police innghahna Lalhmunmawia chu Chanmari FC nen an inhnehtawk ṭumin a inbilh a, Mizoram defender pawimawh Ahmuntea hi MPL10-ah a inlan leh thei kher ang em, tih a chiang lo. Veteran defender B. Zoramthanga'n (B. Sena) inhliam vangin Chanmari a hmachhawn thei lo a, Electric Veng lakah an chhawr luh a ṭul hial ang. Chutihrualin MPL1-a Dinthar FC champion puitu R. Lalthantluanga (Lalmama) hman tur a la awm tho mah se right back ṭha Lalrinzuala Khiangte chu inhliam vang thoin awl thei a ni.

Electric Veng lamah captain C. Lalhriatpuia a rawn kir dawn a, Reliance Youth Sports-a Hrangbana College tana golden ball leh golden boot dawng thei KC Malsawmsanga an kawl bawk avangin an goal bawh a na sawt ang.

Police hi panganaa awm Chhinga Veng aiin point hnih chauhin an hmu tam a, an dinhmun a him lo tih hriat a ṭha. Season liam ta khan BS-a Colney te hi season tawpah an chesual a, pangana niin semifinal an khel pha lo tih hriat a ṭha bawk.