Aizawl District Congress Committee (ADCC) chuan nimin khan R Dengṭhuama Indoor Stadium-ah Aizawl City Congress Workers Meet an buatsaih a; Congress party president Lal Thanhawla'n thu sawiin, politics chu pehhêl taka luhchilh chi a nih loh thu a sawi.
MPCC President chuan, politics chu ram leh mihring nun nghawng thil a nih thu sawiin, "Silh leh fên, ei leh bar mai ni lo, thlarau nun thlengin politics hian a nghawng. Pehhêl taka politics hi luhchilh chi a ni lo a, huaisen takin dik nia kan hriatah kan kal tur a ni. Kan bul ṭanna a dik tur a ni a, ding tharte thusawi ka ngaithla ve a, thu dik chanvea bul ṭan ka hmu nual," a ti.
A kaihhruai sorkar duhthawhtu an tam hle tih sawiin Lal Thanhawla chuan, "Khawvel mite min duhthawhna hi chu chuti teh chiamin ka pawisa lo, duhkhawp roreltu an hmuh ngai dawn loh avangin. Vawiina min duhthawhtute hi sorkarna an chang ang tih a hlauhawm a, keini aiin an corrupt in, an induhsak dawn," a ti a; mahni ropui ber leh fing bera in ngaite chu khawvela mi hlauhawm ber niin a sawi.
Lal Thanhawla chuan, mite'n an duhthawh vanga mahni induhthawh ve mai tur a nih loh thu sawiin, "Tun dinhmuna min dahtu hian min duhthawh em tih kan ngaihtuah zawk tur a ni," a ti.
MPCC President chuan an party mite fuihna thu sawiin, "Kan sim tur leh tih loh tur tih ṭhinte sim a ṭul. A ṭul ang anga pheikhai rual taka kal a pawimawh. Hun tlemte chauh kan nei tawh a, kan dote hi an khirh hle dawn a, insiamṭhat ngaihna apiangah insiamṭhat a ṭul," a ti a; rorel zel turin mahni hmasialna leh duhâmnate sim turin a chah.
Kawng chungchang sawiin Lal Thanhawla chuan, "Fûr laiin a ṭha thei lo. Kawng chhiat chhan tam tak a awm a, a bulpui ber chu March 1 aṭangin vawiin thlengin ruah a la sûr a ni. Lo hâl hun bitukah pawh lo neitute'n an hâl thei lo a, an remchan hun huna hâl tura tih a ngaih phah. Puhmawhna tur min zawng a, eirukna leh rorelna dik loah puhmawhna tur min hre lo," a ti.
MPCC President chuan inthlan a hnai a, Chakma huat inzirtira vote khawn an awm thu sawiin, "Chakma a rûk a rála rawn lutte hi tumahin ṭha an tih ka ring lo. Chakma a rûk a rála rawn lutte nawr lêtah chuan Congress-in a ti ṭha lawr lak a, sorkar apiangin 100 chuang kan thawn let a ni," a ti a; Congress kaihhruai sorkar chu electoral roll aṭanga Chakma mi 5,000 chuang paih ngam awm chhun niin a sawi.
Chakma-te awmna ṭhin chu Mizote lal ram a nih ṭhin thu a sawi a, "Mizote kan awm ṭha peih lo a, ram ruak a awm miau avangin an rawn hnawhkhat a, an awm reng takah chuan India danin khua leh tuiah a rawn pawm a ni. An cheng tam hret hret a, ngaimawh tham an lo awm ta a ni," a ti.
Inkhawm hi ADCC vice president Vanlalzuiliana'n a kaihruai a, ADCC president R Vanlalvena'n ADCC nihphung, hmalakna leh an dinhmunte a sawi a, resolution pali an pass a ni.
ADCC resolution pass-te
Ø Kawng tinrenga Mizoram hmasawnna tur leh miretheite chhanchhuah nana inpe zo, remna leh muanna duh vanga mahni inphata lal-
ṭhutthleng pawh kiam ngam ram pum huap hruaitu tling leh chhuanawm chief minister Lal Thanhawla kaihhruaina hi thlamuanthlak kan ti.
Ø Chief Minister leh a thawhpui minister leh MLA-te'n Zoram hmasawnna hna lungrual tak leh chak taka an kalpui hi chhuanawm kan ti.
Ø Mizoram mamawh power-a kan intodelh nana Tuirial Hydel Project hawn mai theih tura a awm te, sport lama nasa taka hma kan sawnzia te, Referral Hospital a nih dan tur anga thawm ṭhat zel a ni lo ni tate leh dan leh thupek kenkawhna lama kan sorkar chak tak hmalakna hi chhuanawm kan ti.
Ø Kum 2018 MLA inthlan kan hmachhawn mek a, Lal Thanhawla hruaina hnuaiah sokarna siam leh ngei turin Aizawl city Congress worker kalkhawmte theihtawp kan chhuah zel ang.
