Manchester United pre-season tour-a a tel loh hnuah Cristiano Ronaldo chu Old Trafford-ah a kir a, Portuguese forward hian nimin khan coach Erik ten Hag chu inbiakna a neihpui.

Ronaldo hian Champions League khel lo tur United hi chhuahsan a duh thu a hrilh a, amah duhtu club an awm a nih chuan chhuah phalsak turin Red Devils thuneitute a lo ngen tawh. Kum 37 mi forward hian Man United training a zawm lo zui a, pre-season tour-ah pawh a tel lo - a zin ve loh avang hian Man United hian sum tam tham tak an hloh ngeiin a rinawm.

Mahse, Ronaldo hian chhuah duh mah se he thu buatsaih a nih thleng hian serious taka dawrtu a la nei lo a, Ten Hag nena an inbiakna hian rah ṭha a chhuah ang em, he thu buatsaih a nih lai hi chuan hriat theih a la ni lo.

Man United hian July 30 zanah Atletico Madrid nen friendly match an khel dawn a, an inkhelhna tur hmun hi Norway a ni. England-ah kir zuiin Rayo Vallecano nen July 31 zanah pre-season match hnuhnung ber an khel ang a, August 7 zanah Brighton & Hove Albion nen season thara an league match hmasa ber an khel zui ang.

Dinna ngai
Man United hian Ronaldo hi zawrh lai a nih loh thu vawi tam an sawi tawh a, season hmasa lawka fapa tlan bo kir leh ang maia an lawm hi chhuahtir an tum lo - an hnena cham turin an duh.

Red Devils boss thar Erik ten Hag pawhin Ronaldo chu zawrh lai a nih loh thu a sawi tawh a, a ruahmannaah a tel thu a sawi bawk - pre-season-a United game enin, Dutch coach ruahmannaa Ronaldo tel dan tur hi hriat a châkawm hle.

Ten Hag hian pre-season tour an neih hma khan Ronaldo nen inbiakna an neih thu a lo sawi tawh a, Ajax boss hlui chuan, "Inbiakna ṭha tak kan nei a, mahse, hei erawh Cristiano nena kan inkar a ni.

"Chiang taka ka sawi theih chu inbiakna ṭha tak kan nei tih hi a ni," a ti a, hmaichhan ngeiah an inkawm zui dawn ta a, Man United fan-te chuan inbiakna hian rah ṭha a chhuah ngei an beisei ang.

Ngaihlai Champions League!
Ronaldo-a'n United chhuahsan a duh chhan ber chu Champions League khelh a ni a, mahse, Portuguese forward hian mumal taka dawrtu a nei lo a, amah chelh duh em emtu Man United-a cham a hreh lawi si!

Kum 37 mi Ronaldo-a'n Champions League a khelh loh hnuhnung ber chu 2002-03 season daih tawh kha a ni a, hetihlai hian Sporting Lisbon player niin, UEFA Cup qualifying round-ah a inlan.

Hemi hnuah erawh season 19 ngawt chu a zawnin European football-a club inelna sang ber hi a khel tawh a, hetih chhung hian Manchester United, Real Madrid leh Juventus tan a khel.

Ronaldo hian season 19 a zawnin CL a khel satliah lo a, vawi nga ngawt a champion - Manchester City leh Arsenal la champion ve lohnaah nomawi panga a chawi thei a, kum 19 hnua khelh loh thut a huphurh hi a demawm hran lo.

A man a tam
Ronaldo-a'n kum 40 a hnaih tawh a, a career chawhnu lam a hmang tawh tih a hai lo - hlawhtlin duha tuihal reng player a ni a, Europa League khelh a châk lo hi dem ngawt theih pawh a ni lo.

Season hman zawh takah khan Ronaldo hian match 38 khelin goal 24 a khung a, team tan a la thawhhlawk tih a lang. Hei chauh a ni lo - khelmual pawn lama club sumdawnnaah a la thawhhlawk viau a, eng club tan pawh Ronaldo lakluh hi sum hmuh belhna a ni.

Mahse, social media pathum instagram, facebook leh twitter-a follower maktaduai 720 nei thei Ronaldo hi mahni thu duh ve tak a ni a, coach tam takin an thutluknaa sawi tur lo nei ve ṭhin tur player enkawl hi an châk lo.

Man United-in kum hnih chhung atana Ronaldo an lei khan pound maktaduai 60 sen an inhuam - hei hi a man piah lamah a hlawh nena chhut telin a ni a, kar khatah £450,000 vel a hlawh miau avangin club tam takin heti zat hlawh tura kum 37 mi lakluh hi an châk lo bawk.

Duhtu a vai!
Ronaldo-a'n chhuah a duh ruala hming ri ring ber chu Chelsea an ni a, club neitu thar Todd Boehly chuan Ronaldo agent Jorge Mendes chu inbiakna a neihpui hial - Boehly hi American a ni miau a, Ronaldo a duh hi a awm lo hran lo.

Mahse, American sumdawng hausa hian transfer-ah coach Thomas Tuchel a thutlukna a ring ber a, German coach hian Ronaldo mamawh a inti lo - Tuchel hian centre-forward lakluh chu an tum ber a nih loh thu a sawi tawh.

Chelsea hian tlarhmaa khel turin Raheem Sterling chu Manchester City aṭangin an lei tawh a, Kai Havertz chu number 9 nih chhunzawm tura beisei a ni bawk.

Nipui transfer-a Lorenzo Insigne leh Dries Mertens chântu Napoli hming pawh a ri a, mahse, he thu buatsaih a nih thleng hian Italian club-in official taka Ronaldo dawrna an la nei lo.

Atletico-ah maw?
Ronaldo-a'n Real Madrid-ah match 438 khelin goal 450 a khung a, Real tan legend a ni - mahse, heti chung hian Real hmelma Atletico Madrid hming lam rik a ni a, Diego Simeone enkawl team hian an duh niin an sawi.

Portuguese forward hian season hmasa khan Manchester City a lo zawm ṭhelh tawh a, Rio Ferdinand-a'n Man City-a zawm chuan Man United-a a thawnthu a bawrhban vek tur thu a hrilh vang chauhin United a thlang nia sawi a awm.

Hei vang hian Ronaldo hian Champions League khelh a châk miau avangin Atletico pan a hreh kher lo mai thei. Mahse, Atletico fan-ten Ronaldo an duh lo a, online-in #ContraCR7 (AgainstCR7) tih chu an kalpui mek - Ronaldo tan pan chi a ni lo a, Atletico tan fan-te duh lohna haider chi a ni lo bawk.

Atletico hian Ronaldo meuh lalut tur chuan sum an ngah a ngai bawk - mahse, Simeone-a'n a duh tawh loh Alvaro Morata leh Saul Niguez hralhna tur a hre rih lo a, Atletico tan Ronaldo rim loh a fuh zawk.

Bayern duh loh
German champion Bayern Munich hming a ri ring hman viau a, mahse, club chief executive officer Oliver Kahn chuan, "Cristiano Ronaldo hi dah sang viau mah ila, ani lakluh hi kan club kalphung nen a inmil lo. Ronaldo lalut ta ila, Bayern leh Bundesliga tan thil ṭha ber a ni ang em, sawi harsa ka ti," a ti.

Bayern boss Julian Nagelsmann chuan, "Ronaldo lakluh duh anga min sawina zawng zawng ka hmu a, mahse, thudik tawk lo a ni," tiin a lo sawi tawh bawk.

Ronaldo lalut thei tur zingah Paris Saint-Germain-in pawisa nei mah se mimala Lionel Messi elpui ber lam an hawi lo a, Manchester City leh Liverpool ten Erling Haaland leh Darwin Nunez an lakluh tawh avangin Ronaldo an mamawh lo.

Tottenham Hotspur-a hlawh hnem ber Harry Kane-a'n kar khatah £200,000 a hlawh a, an tan Ronaldo lakluh chi a ni lo. A bik takin Premier League-ah chuan Ronaldo hian Champions League khel tur club zingah kalna tur a nei lo ni berin a lang.

Hawi vel ila
AC Milan-in uchuak taka sum sen an tum lo tih tilangin an player langsar Gianluigi Donnarumma, Hakan Calhanoglu leh Franck Kessie te meuh pawh free transfer-in an lo chhuahtir tawh a, Ronaldo lei tur chi an ni lo tih a lang.

Inter Milan-in Romelu Lukaku an neih avangin Ronaldo lam hawi turin sum an nei lo a, Barcelona-in Robert Lewandowski an lei tawh a, Real Madrid lahin Ronaldo koh kir tumna an nei lo.

Borussia Dortmund-in Sebastien Haller leh Karim Adeyemi an lalut tawh a, Champions League khel tur club langsar la bang zinga mi Ajax leh RB Leipzig lahin an lakluh rin a harsa.

Ronaldo hi Saudi Arabian club, an hming tarlan loh chuan kar khata £2.24mtd hlawhtir an huam a, a man atan Man United hnenah £25mtd pek an inhuam bawk - mahse, kuminah ringawt pawh £96.3mtd hlawh tura an chhut Ronaldo mamawh chu sum ni loin, Champions League khelh a ni!