European Championship 2024 chu khelh chhunzawm zel a ni a, group stage-ah pawh inkhel hmuhnawm tak tak en tur a awm zel - zaninah pawh inkhel hmuhnawm bik en tur a awm dawn a, men rei zan a ni e!

Zan dar 12:30-ah Netherlands leh France an intawng dawn a, European football-a team langsar pahnih hian champion an tum avangin zanin an inkhel tur hi champion tura an ṭhat tawk leh tawk loh inenchhinna ṭha tak a ni thei ang.

Netherlands-in an match hmasa berah team ṭha Poland chu 2-1 in an hneh tawh a, a tikimtu ni tura Germany pan an ni lo tih an pholang. France-in 1-0 in Austria an hneh hram a, Netherlands lakah a harsa zual dawn.

Zanin inkhela chak zawkin round of 16 an lut nghal dawn a, Poland leh Austria hi team ṭha ve tak an nih avangin European football ram lian pahnihin, an match hnuhnung bera thih thaa beih kher ṭul loa zanina an hma hun chinfel an duh ang.

Mbappe a tel dawn lo?

Austria nen an inkhelh ṭumin France captain leh chhuanvawr Kylian Mbappe chu a hnar ruh a tliak a, Real Madrid striker thar hian training zawm tawh mah se, zaninah inkhel bul a ṭan kher ang em, hriatthiam a harsa.

Mbappe hi a inlan a nih pawhin hmai kawr vuah chunga a inlan a ṭul tawh dawn a, coach Didier Deschamps-a'n zanin atan chuan chawlh hahdamtir a thlang zawk a nih pawhin a awm lo hran lo ang.

Deschamps-a'n 4-2-3-1 bawk a hman leh a rinawm a, chuti a nih chuan tlarhmaah kum 37 mi Olivier Giroud a mal tlat ang a, a hnung chiahah Antoine Griezmann a awm ang - mual sir aṭanga thlawp turin Marcus Thuram leh Ousmane Dembele an awm dawn.

France-in Eduardo Camavinga leh Aurelien Tchouameni nei mah se, Austria laka N'Golo Kante khelh dan en tan Kante an nek chhuah a rinawm lo. Saudi Arabia lama inkhel ta Kante hi Adrien Rabiot nen an inkawp leh ang.

Tlarhnung hi

Kante-a'n Austria goal nawr tur tam tak midfield-ah a dang chat a, heti chung hian Austria hian France lakah vawi ruk shot an nei thei - zaninah team ṭha Netherlands an tum dawn a, fimkhur lehzual a finthlak ang.

France hian si ban nghak turin AC Milan keeper Mike Maignan an nei a, Barcelona defender Jules Kounde chu right back-ah awmin, Arsenal centre back William Saliba leh Bayern Munich defender Dayot Upamecano te chu a laiah inkawpin, Lucas Hernandez chu mual vei lam sirah a awm a rinawm.

Les Bleus-in tlarhnung an nei ṭha viau a, a nawr turin Netherlands an ṭha ve tho tih erawh hriat a ṭha. Netherlands-in Poland an hneh ṭumin Wout Weghorst-a'n chakna goal a khung a, mahse, Manchester United striker hlui hian bul a ṭan a rinawm loh zawk.

Ronald Koeman-a'n khelh dan a tihdanglam viau a rinawm lo a, chuti a nih chuan 4-2-3-1 tho hmangin, tlarhmaah Memphis Depay a mal tlat ang. Atletico Madrid forward hi Barcelona-a beisei a phak loh hnuin Madrid khaw club-ah ngai a awh chho leh mek a, ram tan phei chuan match 93-a goal 45 khung thei a ni - France tan zuam ngawt chi a ni dawn lo.

Netherlands an ṭha?

Football ram ropui sawi a nihin Netherlands sawi hmaih an ni ngai lo a, mahse, tun hnaia an result erawh a ropui lo. Euro 2016 an khelh phak loh hnuah World Cup 2018 an khel phak lo leh a, Netherlands fans an beidawng hman hle.

A zawna major tournament an khelh loh hnuah Euro 2020-ah an tling leh hlawl a, mahse, an tawpna chu round of 16 a ni. World Cup 2022-ah thleng sang hretin, quarterfinal an lut a, Euro 2024-ah chuan champion an inbeisei - squad pawh an nei ṭha.

Brighton & Hove Albion keeper Bart Verbruggen chu si ban nghaktu a ni a, Inter Milan tana khel dun wing back Denzel Dumfries leh centre back Stefan de Vrij, Liverpool captain Virgil van Dijk leh Manchester City left back Nathan Ake ten tlarhnung an veng dawn a, tlarhma nei ṭha France tan meuh pawh tawn tlang an harsa ang.

Midfield-ah PSV Eindhoven player pahnih Jerdy Schouten leh Joey Veerman an inkawp thei a, season tluana khel dun sa an nih avangin Netherlands midfield tinghettu an ni - Paris Saint-Germain player Xavi Simons, AC Milan player Tijjani Reijnders leh Liverpool forward Cody Gakpo te Depay-a hnunga ding turin an awm a, France laka goal khung an châk ang.

Thawnthu hlui

France leh Netherlands hi vawi 30 zet an lo intawng tawh a, France an chungnung zawk - vawi 15 hnehna an chan laiin, Dutch team-in vawi 11 hnehna an chang a, vawi li chu chak zawk awm loin an inṭhen.

Tun hnai inkhel aṭang ngawr ngawra teh erawh chuan France an chungnung lawr lak a, Netherlands hi zaninah pawh an ngam nghal viauin a rinawm - Euro qualifier-ah khan team pahnih hi group khatah an awm a, group B-ah a sang pahnih niin an inpetkai.

France hian qualifier match riatah tlawm an nei miah lo a, Netherlands hi vawi hnih an tlawm - an hneh loh chu France ve ve an ni. Stade de France, Saint-Denis-a an intawn ṭum phei chuan 4-0 ngawtin France an chak a, Amsterdam-ah tihpalh thil a ni lo tih pholangin, 2-1 in an hneh nawn leh sak.

November 2018 khan Netherlands hian 2-0 in France hi an hneh a, UEFA Nations League-a an chak hi Dutch team-in an intawn hnuhnung pariata France an hneh awmchhun a ni - zaninah thawnthu ngaihnawm lo thai boin, bung thar kai an tum e.