Mizoram Poor Federation chuan, Mizoram Universal Health Care Scheme (MUHCS)-a pawisa thawh turah sorkar hnathawkte thâ a na tlat chuan a barakhaih thu an sawi a; mirethei zawkte hma ngaia MUHCS zawm ṭheuh turin mimal damdawi-in neitute an ngen.
Mizoram Poor Federation (MPF) hruaitute chuan nimin khan Aizawl Press Club-ah thuthar thehdarhtute an kâwm a; an president Lawmthanga chuan, MUHCS avangin miretheite thla a muan thu a sawi rualin, mimal damdawi-inte'n an zawm ve thei lo chu pawi an tih thu a sawi.
Sorkar hnathawkte an pawisa thawh tura lungawi lo an awm chu mak an tih thu sawiin Lawmthanga chuan, "Sorkar hnathawkte hi state budget aṭanga 82% vel zet an hlawh leh inrêlbâwl nana hmangtu an ni a, an damloh nikhuaa an inenkawlna tur sorkarin an hlawh aṭanga thla khata an thawh tur a tuk hi thlabi hlawh nei lote pawhin kan inenkawlna tur kan thawh laia an thâ a na tlat hi mahni hmasialna nasa tak niin kan hria," a ti.
MPF President chuan, MUHCS kalpui turah sorkar hnathawk nghet awm lohna chhungkaw pakhatin kum khatah inenkawl nan Rs 5,00,000 hû hman theih a nih laiin, sorkar hnathawk nghette chu an inenkawlna senso turah bituk a awm lo tih sawiin, sorkar hnathawkte chu inngaihtuah ṭha leh turin an ngen tih a sawi.
Lawmthanga chuan, healthcare hmasa chu a hmangtute'n an dam lohin pûk chawpa an inenkawl ṭhin thu leh sensote chu sorkarin rei tak tak a batsak ṭhin thu a sawi a, "A manganthlakzia kan hria a, tun sorkarin sorkar hmasate damlo inenkawlna senso (bill) ba tam tham tak a pe ta hi a lawmawm. MUHCS hmang hian inenkawlna man chu sorkarin kar tin emaw, a rei berah thla khat aia rei loah bill an pek zel tur thu an sawi chunga mimal damdawi-in ṭhenkhatin an hmang duh lo hi pawi kan tii a, mi harsate dinhmun hrethiamin hmang se kan duh hle," a ti.
MPF President chuan, mipui tana sorkar hna thawkte leh mimal damdawi-inte chu mipui rawngbawltu an nihna inhria a, mi retheite hmakhua ngai chunga sorkar thuchhuak leh ruahmannate pawma zawm turin an ngen tih a sawi a ni.
Mizoram Poor Federation hian MUHCS chungchang Mizoram State Health Care Society-a an zawhna leh chhanna an dawnte an tarlang. Sorkar damdawi-in leh mimal damdawi-inte chu MUHCS hnuaiah package rate a hrang siamsak an nih thu te, mimal damdawi-inte chu tehfung hrang hrang hmangin category 5-ah ṭhen an nih thu leh an category mil zelin MUHCS package rate aṭang hian 40% thleng additional incentive an dawn theih thute an tarlang.
MIZORAM POOR FEDERATION TARLAN
* Kum 2006-07 ah sorkar hnathawk medical reimbursement (MR) chu ICICI Lombard hnenah hlan a ni a, agreement anga bill pek kim loh an neihte chu sorkarin report a dawn angte a rulhsak.
* Kum 2008-09 ah mipui náwlpui tana healthcare scheme siam a ni a, open tender hmangin Reliance General Insurance Co Pvt Ltd (RGICL) hnenah dah a ni. Reliance hian damdawi-in leh mimalah ba eng emaw zat an hnutchhiah.
* Kum 2011-12 ah Labour Ministry hnuaia Rashtriya Swasthya Bima Yojana (RSBY), BPL leh MGNREGA job card neite tana kum khata Rs 30,000 bill theihna chuan central guideline angin National Insurance Company (NIC) nen thawhdunna siam a ni. Scheme kalphung (online leh cashless) hi Mizoram damdawi-in leh healthcare society-te'n online leh cashless an kalpui bul ṭanna a ni. NIC hian bá an hnutchhiah lo.
