India sorkarin hmarchhak helte laka beihpui thlak tura a ngenna chu Myanmar sorkarin a ngaihtuah mek.
Myanmar rama hmarchhak hel inkulhte lakah ṭangruala beihpui thlak pui turin India chuan tun hnai khan Myanmar a ngen a, mahse Myanmar chuan hei hi a la ngaihtuah mek thu leh helte beihletna kawngah India chu thlawp a hreh loh thu a sawi.
National Security Advisor Ajit Doval leh Foreign Secretary S Jaishankar chuan hmarchhak helte beih dan tur chungchangah Myanmar ram thuneitute biak tumin March 17 khan an tlawh a, Myanmar hian India chu thlawp a hreh loh thu lo sawi mah se India-in ṭangruala beihpui thlak a rawt erawh a pawm dawn em tih hriat a ni lo.
Ministry of Home Affairs (MHA) official chuan Myanmar-in India chu thawhhona ṭha neihpui a duh thu a sawi a, mahse Myanmar chuan China nena a inlaichinna tihchhiat a duh loh thu a sawi bawk. Myanmar hian a ramah chhungah India nena ṭangruala hel an beih chuan China nena an inlaichinna a chhiat phah an hlauh thu a sawi.
Official chuan Myanmar ram chu ei leh barah China chungah a innghat nasa hle a ti a, Myanmar rama hmasawnna project tam zawk chu China-in a kalpui a ni, a ti.
"Myanmar chuan India nena inhnaih tak anga a lan chuan China nena a inkar a buai phah a hlau a, hei vang hian India leh China chu ṭhianṭha atan a duh ve ve a ni," tiin MHA official chuan a sawi.
Hetihlai hian official chuan hmarchhak hel ṭhenkhat chuan China-in a thawhpui angin sawi mah se China sorkarin a thawhpui tak tak em tih erawh finfiah theih a la ni lo, a ti a, hel ṭhenkhat chuan China-a silai tawlhru ṭhinte chu an thawhpui mai thei, mahse sorkar laipui chuan China sorkar inrawlh leh rawlh loh erawh a la finfiah lo, a ti.
United Liberation Front of Asom (Independent) hotu, Paresh Baruah chuan tun hnaiah China Yunan province a tlawh ṭhin a, ramri an kan theih nan tualchhung mite'n an pui thin a ni, mahse China sorkar official te nen an inbia em tih erawh la finfiah loh a ni, tiin official chuan a sawi bawk.
