Hmeichhe football-ah na na na chuan Japan an te ngai lo a, World Cup apiangin champion tur rinkai zinga mi an ni ṭhin.
Mahse, kum 2011-a world champion ni a, 2015-a finalist Japan tan 2019-ah beisei tur a awm ta lo. Netherlands chuan 2-1 in last 16-ah an hneh a, World Cup an mangṭha a ṭul. Round of 16 inkhel dangah Italy chuan 2-0 in China an hneh bawk a, quarterfinal lut a hriat kim ta - zanin dar 12:30-ah quarterfinal khelh nghal a ni dawn a, Norway leh England an inhmachhawn ang.
Zirtawpni zanah Norway leh England an intum ang a, Inrinni zanah Italy vs Netherlands; Germany vs Sweden ten semifinal luh an inchuh bawk ang.
Mangṭha Japan
Netherlands-in inkhel an thunun zawk a, Lieke Martens chuan minute 17-na lekah goal hmahruai a rawn khung - hei hian Japan a beng harh zawk. Yuika Sugasawa chuan post a rawn pet per nghal dawp a, Netherlands thin phu a rang. Japan an beidawng lo, minute 43-naah goal an hlawh chhuak ta nge nge.
Yui Hasegawa chuan team movement mawi zet hnuah goal ṭha tak a rawn khung. Goal dang lut loin chawlhlawk hman a ni a, an inngam tawk hle. Team pahnihin goal dang lut loin extra time an khelh mai a ngai dawn niin a lang hman - mahse, minute 90-naah Netherlands-in penalty an hmu a, Martens chuan goal-ah chantirin an chak daih!
Penalty chu
Japan-in an penalty chawi chhan an thlirlet chuan an rilru a na vawng vawng ang. Vivianne Miedema shot kawh zet chuan Saki Kumagai kut a per a, hei hi referee-in penalty a pe.
Tun hma chuan 'tih luih' a nih loh chuan referee tam zawkin handball-ah hian penalty an ham kher lo. Mahse, June 1 khan International Football Association Board (IFAB) chuan dan a thlak danglam nual. Chung zingah chuan penalty box-a player an handball chuan tih luih leh tih luih lohah pawh penalty ham zel tur a ni, tih a tel a, he dan zulzui hian referee hian penalty a pe.
Japan-in an chance neih an chhawr loh chu an tuar a tih theih bawk - Hasegawa, Hina Sugita leh substitute Yuka Momiki-te chuan chance duhawm an neihah goal an khung thei lo.
Hmeichhe tan Italy
Italy-in inkhel ṭantir aṭangin game an thunun nghal a, Valentina Giacinti chuan a goal khung hmasak offside vanga pawmsak a nih loh hnuah sawisel rual lohin minute 15-naah hmahruaina goal a khung.
Le Azzurre (Italy hmeichhe team sawina) tan Valentina Bergamaschi chuan goal hnihna khungna remchang nei mah se Wall of China tia hminglem an pek Peng Shimeng chuan ṭha zetin a dan sak. China an harh zawk a, a pawi ber erawh goal an khung thei chuang lo - Aurora Galli chuan second half ṭan aṭanga minute ngana lekah Italy tan a khung leh ta zawk a, goal dang lut loin 2-0 in an chak.
Kum 20 hnua a vawi khat nana World Cup khel Italy coach Milena Bertolini chuan, "Kan team hian kan ram lama hmeichhe football a ṭhan zel theih nan hna ropui tak a thawk a ni," tiin an hnehna chan chu World Cup piahlam a nih thu a sawi.
