Bayer Leverkusen-in hneh loh nei loa match 51 an kaltluang hnuah, Xabi Alonso hote record duhawm tak hi Dublin-ah tihtawp a ni. Europa League final-ah Atalanta-in German club hi Ademola Lookman-a hattrick hmangin 3-0 in an sawp a, Gian Piero Gasperini kaihhrai Italian club-in nomawi an chawi ta zawk.

Atalanta-in Europe inelnaa final an hmachhawn hmasak berah nomawi an chawi nghal. May 26, Pathianni zan hian Serie A-ah Torino an mikhual dawn a, an mual Gewiss Stadium-ah a lawmna hun an nei thei nghal dawn. Gasperini hote hi season thara Champions League khel tura an tlin chian tawh avangin inkhel aia champion lawmna an ngai pawimawh zawk a nih pawhin dem theih an ni lo ang.

Lookman show

Ademola Lookman hi England khaw pakhat Wandsworth a piang a ni a, a naupan lai pawhin England junior team tan a khel ṭhin. Charlton Athletic aṭanga inzir chhuak niin Everton aṭangin hriat a hlawh ṭan a, chutihrualin Toffees-in kum 19 mi a nih laia an lakluhna hi pound maktaduai 11 a ni daih tawh.

Kum 26 mi Lookman hian theihna nei sang mah se Europa League final meuha hattrick siam thei tur chuan tumahin an hmu lawk kher lo ang. England senior team tan khel chak mah se koh a nih miau loh avangin tun hmaa a hnar tawh a nu leh pate ram Nigeria tan a khel ta thung.

RB Leipzig, Fulham leh Leicester City tana beisei a phak loh hnuin Lookman-a'n kum 2022 khan Atalanta a pan a, hetah hian a theihna a lang chhuak. Season liam ta khan Lookman-a'n inelna hrang hrang hrangah goal 15 a khung a, tun season-ah pawh hetiang zat tho hi a khung.

Kumina a goal khung ropuina erawh Europa League final-ah hattrick a siam a, champion rinkai Leverkusen 3-0 in an hneh. Dublin-ah Lookman a langsar a, minute 12-na lekah goal hmahruai a khung. Mual dinglam aṭanga Davide Zappacosta cross nang fuh turin Lookman hi a dawk zawk a, Exequiel Palacios muthlu tlan pelin chiang zetin a pet goal.

Lookman hi a nung chhunzawm a, Leverkusen player tihsual zarah box pawnah ball a chang. Atalanta winger hian a hmaa ding Granit Xhaka kap karah khungin (nutmeg) goal sirah a hlai lut a, Manchester United aṭanga inzir chhuak goalkeeper Matej Kovar tan dah theih a ni lo.

First half-a Lookman-a goal khung a ṭha a, second half-a chak nemnghehna goal a ṭha ber zawk! Minute 75-naah mual vei lamah Lookman hian ball a chang a, a hmaa ding Leverkusen defender Edmond Tapsoba chu step over khumin kawh zetin a pet goal.

Atalanta-in hnehna an chang a, Lookman goal thum hmangin Leverkusen 3-0 in an sawp. England manager Gareth Southgate-a'n inkhel hi a thlir a nih chuan tun hmaa a lo hnawl tawh Lookman hi Euro 2024 squad-a telh a chak khawp ang. Mahse, a tlai tawh - England duh loh Lookman chu Leverkusen record titawptu leh Atalanta champion puitu a ni a, final-ah player of the match a ni bawk.

Fak phu Gasperini

Final-ah Lookman-a goal a langsar a, Atalanta game khelh dan tur duangtu Gian Piero Gasperini-a'n fak a phu. Europe club lian hoin an it rawn, Xabi Alonso tactic aiin Gasperini tactic a thawk zawk a, Spanish manager-in ngam loh a tawng.

Atalanta hian high pressing game an khel a, tlarhnung aṭanga ball in pass chhuak ṭhin Leverkusen an talbuai phah hle. Italian club game plan a hlawhtlin theih nan eun Koopmeiners leh Ederson ten midfield-ah hna ṭha tak an thawk a, midfielder-ten pressing game an khelh vanga hmun ruak a awmin centre back Isak Hein-a'n a rawn hnawh khat ṭha hle.

Leverkusen-in ball an inpek kual theih miau loh avangin ball an vawrh a ṭul a, German club-in an thiam dan berin an khel thei lo. Mual laiah German club-in an hneh lo a, Granit Xhaka leh Florian Wirtz ten an theihna an lantir lo. Football-ah chuan thiam bik zingah mi vannei an awm ṭhin a, Lookman hi a vannei tel. Captain Marten de Roon dam ṭha se, bul ṭantu ni loin bench-ah a awm a rinawm zawk a, chutihrualin Nigeria international hian a hun ṭha a bawhpelh lo.