Cheng vbc. 18.21 senga Zuangtui Venga sak Mizoram Badminton Centre chu nimin khan hawn a ni a, a hawngtu chief minister Lalduhoma chuan politics hmanrua atana sports hman an phal loh thu a sawi.

Chief Minister chuan badminton chu game ngainatawm tak a nih thu sawiin, "Kum 70 pelh tawhah khel kan awm fur a ni. Khawvel huap pawha game langsar ber pawl ni phak a ni a, Olympics-ah pawh mipuite hmuh duh ber pawl niin kan Asian puiten medal an la hnem tawh hle a ni, India ram pawh a tha ber pawl niin Mizote tan pawh medal lakna tura beiseiawm tak game a ni," a ti.

Lalduhoma chuan infiamna lamah Mizote hi kan lo la thleng sang lo tih sawiin, "India rama a ṭha ber ber kan nih phawt loh chuan khawvel huapin kan lang mai dawn lo. Infiamna hi a atchilh tlat an awm loh chuan hlawhtlin a har a, tih tak zetna rilru leh tumna tak tak neih a ngai a ni. Sport hi politic hmanrua atan hman ka phal lo," a ti a, politics huanga sports la lut tute chu infiammite ti beidawngtu an nih thu a sawi.

India sorkar chu kum 2036 Olympics thlen tumin ṭan a la chho mek tih sawiin Chief Minister chuan, "Sports Minister kaihhruainain Vision 2036 kan kalpui mek a, India ram aiawh thei turin Mizo ṭhalaite chher chhuah kan lo tum ve dawna, naupang talent nei ṭhate zawn chhuahna, Empowering Mizoram Sport kan kalpui mek a ni. Karleh mai khian chutianga hmalakna pakhat, Tuichangral Games an neih turah han telpui kan tum," a ti.

Thusawitu dang UDPA minister K Sapdanga chuan, "UDPA leh Smart City Mission-te chuan kan mawhphurhna pakhat chu he center atan hian kan hlenchhuak ta a, a veng neitu leh khawtlang hruaitute, badminton player-te kutah he badminton center hi a awm dawn. Tun aṭanga kum 5 ah chuan he center atanga zir chhuak hming hi national level-ah a intlar ve kan beisei," a ti a, vbc. 18 zet sen na hian Mizo ṭhalaite eizawnna lo siamsak an duh takzet thu a sawi.

Sports minister Lalnghinglova Hmar pawhin thu sawiin, "He hmun hi ṭangkai taka hmang turin badminton khel ṭhinte ka sawm che u a, a bikin faina kawngah ṭan lo la ang che u. Kuhva chhakna hnu hma leh Meizial bung nena inchawhpawlh infiamna hmun hma a nih loh ka beisei. Dulkiar tih rehna atan leh thlan tih tlak ve hrim hrimna hmun lian tak ni ringawt lo, medal vaw chhuak thei building chhawrnahawm tak lo ni se ka duh," a ti.

Centre hawnnaah hian dy. chief minister hlui Tawnluia leh Mizoram Badminton Association president Dr R Lallianzualate pawhin thu an sawi.