A tawpah Dinthar FC-in point an hmu dawn emaw tih hnuah, a tawp tak takah Chhinga Veng FC an inlâr!
Mizoram Premier League Season 6-ah Chhinga Vengin point 17 an hmu a, phase 1 zawhah point nga zetin hma an hruai.
Nimin tlai inkhel hmuhnawm takah Chhingcows hian Dinthar FC 3-1 in an hneh. Chhinga Veng tan Malsawmfela'n goal hnih a khug bakah Laldampuia'n goal a khumg bawk.
Goal hmaa vanduai
Chhinga Vengin first half an thunun a, ball an chan tam bakah goal attempt vawi 11 an nei a, Dinthar erawhin vawi nga chiah goal attempt an nei thung.
Kelkang tlangval Khawpuimawia'n chance ṭha nei hmasa berin hun a mamawh tam avangin Dinthar defender Lalbiakzuala'n a tibuai hman.
Chhinga Veng forward Vanlallawma'n keeper chauh a hmachhawn hnuah crossbar chungah a pet.
Chhingcows tan R. Malsawm-tluanga, MSDawngliana leh Malsawmfela ten goal khung theihna turah an hlah vek.
Dinthar lamin a khat tawkin chance an nei ve tho a, Nigerian striker Jackson Victor chu Chhingcows tlarhnung tibuaitu ber a ni.
Game plan thlak
Dinthar defender Clarence Carter-a'n first half ah defensive midfield hna chelh mah se ball a chhuhsak tam lo a, second half-ah tlar hmaa a hnampui Jackson puitu atan hman a ni.
Maimawms-in second half-ah bul an ṭan ṭha a, Chhinga Veng an bet zawk. Dinthar goal nawr a na nghal a, a hmawr erawh an bawk fuh thei lo.
Penalty leh Own Goal
Minute 55-naah Chhinga Vengin Laldampuia an luhtir a, minute thum hnuah Kawrtethawveng tlangval ball petin Lalnunpuia kut a per a, referee-in penalty a pe. Sawmfela'n Dinthar keeper Malsawmdawngzela bumin chiang zetin a pet goal.
Chhinga Vengin goal khat chak pui tum mah se minute 81-naah David Lalrinchhana cross chu Chhingcows captain Lalrinchhana'n an lamah a pet lut a, inkhel a nung sawt.
Sawmfela leh Dampuia
Minute 90-naah Dinthar substitute Samuel Laltlanthanga pet chu goalline aṭangin Chhingcows defender Hmingthamawia'n goal line aṭangin a dang.
Chhinga Vengin vaw let nghalin Dampuia ball vawrh ṭha changtu R. Laldinliana'n chak taka a lakluh hnuah a cross chu Sawmfela'n hmahruaina goal ni turin a khung.
Injury time-ah MS-a ball ṭha vawrh luh chu offside trap bumtu Dampuia'n chak nemngheh nan goal-ah a chantir bawk.
