Lengpui Airport tihchangtlunnaa dan bawhchhiaa chief minister hlui Zoramthanga puh a nihnaah Mizoram Lokayukta chuan chief minister Lalduhoma'n thuthar thehdarhtute a kawm ṭuma a thusawite an ngai pawimawh a, an zâwt chiang mek.
Mizoram First Movement (MFM) chuan Lengpui Airport tihchangtlunnaah dan bawhchhiatna a awmah ngaiin March 14, 2022 khan Lokayukta-ah complaint an thehlut a, a mawhphurtu berah chutih laia PWD enkawltu chief minister Zoramthanga an puh a ni.
Lokayukta chuan GAD thu a zawhfiah hnuah Anti Corruption Bureau (ACB) chu zir chiang turin a ti a; ACB report thehluhah duhkhawp loh an neih avangin Lokayukta chuan ACB chu zawhna a zawt leh a, ACB-in an chhàn leh hnuah hearing (sawihona leh inzawhfiahna) buatsaih a ni.
Mizoram Lokayukta chuan ṭum hnih hearing an nei tawh a, November 11, 2023 leh January 16, 2024 khan an buatsaih a; thutlukna erawh a la siam lo.
Chief minister Lalduhoma chuan, Lengpui Airport chei ṭhat chungchang hi January 6, 2024-a CMO conference hall-a press conference a neihnaah a sawi chhuak a; chu a thu sawi chu Lokayukta chuan ngai pawimawhin, CM Private Secretary hnenah January 19, 2024 khan a zawtfiah.
CM Lalduhoma hian thuthar thehdarhtute a kawmnaah hian Delhi aṭanga Aizawla a rawn haw lamah Lengpui Airport a enfiah nghal thu sawiin, "Kamrula ten Airport-ah ramp an siam mek a, sum sên a tam hle. Estimate-ah ramp bang siamna tur a tel a, mahse, a bang siam loin an kalsan a ni," a ti a, ramp bang chu siam leh nghal turin thu a pek thu a sawi.
Airport terminal páwn lama kawng chhâwng chu cheng nuai 700 chuang hmanga siam a nih thu sawiin Lalduhoma chuan, "Kamrula siam a ni. Terminal-ah a pawhna dopping zone pahnih a awm a, dropping zone hi a chung zâr a ni lo ve ve a, estimate-ah a chung zàr tur a tel a, a chung zâr nghal ve ve turin ka hrilh," a ti.
Chief Minister chuan, "Airport baggage area a sir lehlamah chauh an dah a, a sir lehlam lehlama dah turin ka hrilh a, hei pawh hi estimate-ah a tel sa. Contractor-te'n estimate ang takin an siam tur a ni," a ti a; airport chei ṭhatah aerobridge telh a ni lo chu pawi a tih thu a sawi bawk.
Tarlan tawh ṭhin angin, MFM chuan Zoramthanga chu CM a nih laia a thuneihna hmang khaw lo leh chhungkhat laina duhsak uchuakah an puh a, "India Danpui Article 14 a bawhchhiat avang te, General Financial Rules 2017-a Rule 162-na leh Vigilance Commission thuchhuah hrang hrangte a bawhchhiat avangin Prevention of Corruption Act, 1988 hnuaiah thubuai siamsak ngei turin Lokayukta-ah kan thlen a ni," an ti.
