Mizo Zirlai Pawl (MZP) chuan nimin khan West Phailenga pandal an sak Lalbuanga Rûnah Zofest an buatsaih ṭan a, chief minister Lalduhoma khuallian a ni. CM chuan, fa pathum leh a aia tam nei chinte hamṭhatna duan an rilrûk thu a sawi.

Chief Minister chuan, Zo fate an tam a ngaih thu sawiin, "Fa kan ngah deuh deuh a ṭul. Kan ram hi ram dangte nena khaikhin chuan density of population a la hniam a, mihring tam zawk chenna tur ram kan la nei. Pun hi kan sorkar policy a nih avangin nupa, fa pathum leh a aia tam nei chinte hamṭhatna duan hial kan rilrûk a ni," a ti.

Lalduhoma chuan, zirlaite chu zirna uar tur a chah rualin, lehkha zir kawngah an thleng sang thei lo a nih pawha hnual lo turin a fuih a, "Theihna dang, i din chhuahpui theih thilpek i nei ang tih ring tlat ang che. Vawi hnih khat fail vangin hnual suh. Khawvela industry leh company lian tak tak dintu te, entreprenuer ropui ber berte zingah lehkha zir sang lo an tam lutuk," a ti a; Mizoram chu industry awm lohna ram anga hriat ni mek mah se, industry rama chantir a ngaih thu a sawi.

Ram ro hlu ber chu human resource ṭha a nih thu sawiin Lalduhoma chuan, "Ram leilung hausa takte pawh a chhunga cheng mipui thiamna leh theihnain a tlin loh chuan ram changkang an ni lo a, leilung hausakna nei lo mah se, a chhunga cheng mipuite'n an zir miau chuan ram hausa leh thil tithei takah ram tam tak an chhuak ṭhin," a ti.

CM Lalduhoma chuan, Hand-holding scheme hmangin khai chhuah tlak ṭhalaite dinchhuahtir an tum thu sawiin, "Dahkham ngai loin in hmalakna tur loan in la thei dawn a, sorkar chu indahkhamah kan ṭang dawn. Loan in rulh ṭhat chuan a pung pawh kan pe kîr dawn che u," a ti a; Bana Kaih scheme chhawr thei tura inbuatsaih turin zirlaite a fuih.

Zofest-ah hian thupui chu 'Hrui khat vuanin' tih a ni a, Chief Minister hian Zofest souvenir 'Zawlbuk' a tlangzarh. MZP vice president C Lalremruata'n inkhawm kaihruaiin, president H Lalthianghlima leh general secretary Chinkhanmanga Thomte bakah, Chin Baptist Church, USA, Myanmar MP leh Thangram Indegenous People Movement aiawhte'n thu an sawi bawk.

Tun ṭum Zofest-ah hian Mizoram bakah Myanmar, Manipur, Assam, Bangladesh, Tripura, Assam leh USA aṭangin palai an kal a; Zo hnam pêng hrang hrangte'n hnam lâm leh zai an entir a ni.

Zofest hi kum 2002 khan Lamka, Manipur-ah buatsaih ṭan a ni a, kumin hi vawi 10-na a ni. Mizoram bakah Manipur, Assam leh Tripura-ahte nghah a lo ni tawh.

CHIEF MINISTER THUSAWI DANGTE

• Kawng tam takah MZP nen ram leh hnam tan hna kan thawkho mek a, kan hruaitute an felin an huai a, 'Thil dik lo siamṭha tura hma in laknaah sorkar mitmei veng vak suh u,' tiin ka lo chah mai ṭhin.

•* Mizote hi tunah hian khawvela hnam dam rei lo ber zinga mi kan nih ka ring.

• Ṭhalai thi kan tam lutuk a, a bik takin ruihhlo vanga thihna a tam. Kan insiamṭhat ngei ngei a ngai.

• Ṭhalaite'n ruihhlo hi lo hnar ngam u la, a bâwihah lut reng reng suh u.

• Sorkar pawhin theihtawp a chhuah dawn a, dan pawh siamṭhat a tum a ni.