Football-a thuneitu sang ber Federation International de Football Association (FIFA) chuan All India Football Federation (AIFF) inrelbawlnaah 'pawn lam mi' (third party) an inrawlh nia ngaiin AIFF chu a hrem ta a, FIFA leh ram dang nena football-a a inzawmna a chhu chat vek - he thu hi August 15 zanlai pelh khan FIFA chuan a puang.

Hei hian nghawng a neih len ber pakhat chu October-a India-in a thlen tur FIFA Under 17 Women's World Cup pawh India-ah kalpui theih a ni dawn lo a, India-in international match pakhatmah a khel thei dawn lo a, FIFA aṭanga sum a dawn ṭhin pawh a dawng chhunzawm thei lo ang.

Hetihlai hian FIFA-in India a mihran dan hi ram dang a hremte nen chuan a inang chiah lo a, FIFA hian India-in a zawm tur thu eng emaw zat a nei a, hengte hi India-in (Supreme Court, COA leh sorkar telin) lamin an zawm thei a nih chuan FIFA hian hremna hi hlih a rem ti ang.

Hremna lehkha chu
FIFA-in India a hremna lehkha hi August 14-a ziah tawh a ni a, FIFA Council-in AIFF hnenah August 15 zanlai pelh tawhah a thawn.

He lehkhaah hian chiang taka inziak chu India rama football rorelnaah pawn lam mi an inrawlha a hriat vang a ni - he ta pawn lam mi a tih hi Supreme Court (SC) leh SC-in AIFF enkawltu tura a ruat Committee of Administrators (COA) te an ni.

FIFA hian an lehkhaah hian COA hi hlip nghal tur leh football inrelbawlna chu pawn lam mi inrawlh loin AIFF-in a keng tlang tur a ni tiin an ziak.

FIFA hian football-ah thuneitu dang (court/sorkar) a awm a rem ti lo a, midang an inrawlh chuan chu rama football federation chu a hrem mai ṭhin a ni.

Buaina bul eng nge?
Kum 2017-a AIFF inthlanna chu National Sports Code nen a inmil lo tiin sports activist leh lawyer Rahul Mehra chuan Delhi High Court-ah a khing a - thlan tlinte kum chungchangah te, term hman theih zat leh thil dangah National Sports Code kalh tiin a khing.

Delhi High Court hian AIFF inthlanna pawh chu dan kalhah a puang ve nghal a; nimahsela AIFF lam chu SC-ah zualkoin SC chuan kum 2017 daih tawh khan National Sports Code mila AIFF dan (constitution) thar duang turin COA a ruat a - COA-ah hian mi pahnih Chief Election Commissioner hlui Dr SY Quraishi leh Indian football team captain hlui Bhaskar Ganguly ruat an ni.

COA-te hian AIFF constitution thar hi an duang fel mai lo a, he mi chhung hian kum 2017-a AIFF hruaitu thlan thar Praful Patel leh a thawhpuite term chu kum 2020 December khan a ral hman tawh a ni.

Hei tak hi President term thum hmang zo tawh, thlan nawn theih tawh loh Praful Patel hian remchangah hmangin 'AIFF-in dan thar a la nei lo, SC thu lo chuan inthlan theih a ni lo,' tiin inthlan a buatsaih duh lo a, a hun tawp hnuah pawh President hna a kalsan duh lo.

President hun tawp hnua bang duh lo Praful chu SC-ah Ranjit Bajaj chuan a khing ve leh ta a; May 18, 2022 khan SC chuan hei hi ngaihtuahin Patel chu thiam loh a chantir a, amah leh a thawhpuite chu AIFF aṭangin a chawlhtir nghal.

SC hian AIFF enkawl turin COA pahnih awm sa bakah Supreme Court judge hlui Justice AR Dave chu a ruat belh zui bawk.

COA-in kuang lo a nawr?
SC-in AIFF hruaitu a bân vek hnu hian COA pathum kutah AIFF chu a awm ta. SC-in an hna atana a tuk chu AIFF dan thar duan a, a rang thei anga AIFF inthlanna buatsaih a ni.

AIFF hruaitu ber an awm tawh si lo a, State Football Association lam chuan video conferencing neiin COA-in AIFF dan thar a duanna kawnga state FA aiawh tur mi pasarih ruatin anni leh COA-te hi an indawr zui nghal a, June 11 khan Delhi-ah boruak ṭha tak huaiah an inhmu. He inbiaknaah hian COA hian State FA lam rawtna an ngaihthlak thu leh thui tak an pawm thute an sawi a ni.

Hetihlai hian AIFF inrelbawlna pangngai titawp a, football mi pawh ni lo (third party) COA-in football a enkawl chu FIFA duh dan a ni lo a, FIFA leh AFC chuan India ramah palai tirin thil awm dan enfiahin June 21 khan an rawn kal.

FIFA palaite hian COA, State FA aiawh leh club aiawhte an kawm a; State FA aiawhte hnenah, "Tunah hian India suspend-na tur lehkha kan rawn keng. Signature pek chiah a ngai tawh a; nimahsela nangmahni berin COA hnathawh dan ṭha in tih thu leh, State FA tana pawi an khawih loa in sawi avangin kan hrem lo ang che u a, chutih rualin COA hnathawh zawh hun tur leh inthlan hun atan hun bi kan ruat ang," tiin an hrilh.

COA hian a tira State FA nen an indawrna bakah mi hrang hrang an kawm kual a, rawtna hrang hrang la khawmin chu'ng zingah chuan international footballer hluite AIFF-a member an nih theih dan leh vote an neih theih dante an rawn duang ta.

Hei hi State FA chuan ṭha ti loin an sawisel a, FIFA dan kalh a nih thute pawh an hrilh a; nimahsela COA lamin India football siam ṭhatna hmahruai a nih thute sawiin SC lamah an dan duan thar (draft constitution) chu State FA duh loh danin an thehlut ta a ni.

Hei bakah hian COA hian AIFF dan awm sa tam tak an thlak danglam a, Vice President panga awm ṭhin an tibo a, Executive Committee member 10 awm ṭhin chu pangaah an tihniam a, vote nei thei leh inthlana chuh thei turte pawh nasa takin an siam danglam bawk.

COA versus State FA?
June thlaa FIFA palai lo kalte khan COA hi dan siam fel hun tur, inthlanna kalpui hun turte an hrilh bakah dan siam thar chu State FA pawmpuina lak tur thute an hrilh chiang vek a; nimahsela COA hian State FA hi an palzut nasa hle.

July 6-ah COA leh State FA aiawhte an indawr leh a, hetah hian State FA chu lungawi loin COA draft constitution chu pawm lo turin SC-ah thlen ve an rel zui ta a ni.

July 16 khan COA chuan an draft constitution chu SC-ah an thehlut ta a, July 21-ah SC-in a ngaihtuah a, State FA lamin hei hi pawm lo turin nasa takin an nawr a, Au
gust 3-a ngaihtuah nawn tura dah a ni.

COA draft constitution-ah hian FIFA danpui kalh ṭhenkhat a awm a, State FA ang thoa player malin vote an neih ve chu FIFA hian pawm loin thlaktir turin July 26 khan AIFF-ah lehkha a thawn a, hetah hian AIFF constitution hlui anga inthlan buatsaih turin thurawn a pe tel bawk. Heng FIFA thute hi COA hian hai derin thurawn an hmuh ang leh an duh dana kalpui an tum ta zel a ni.

Draft constitution chu August 3-ah SC chuan a ngaihtuah leh ta a, hetah hian thutlukna siamin COA dan siam zingah inthlanna kalpui dan tur chin chu a pawm a, thla thum atana hruaitu lailawk thlang tur leh, FIFA Under 17 Women's World Cup neih zawhah thil dangte chu ngaihtuah leh a, hruaitu pawh thlan ṭhat leh turin a rel ta a ni.

Buaina belhchhah a ni
SC thutluknaa lungawi lo State FA-te chu August 6 khan video conference hmangin an inko khawm leh a, hei hi Praful Patel-a koh niin Patel hian FIFA aṭanga lehkha lo kal chungchangte a sawi fiah a, State FA aiawhte hian SC thutlukna chu ennawn leh tura ngen (review petition) an rel zui bawk a ni.

State FA-te inhmuhkhawm hma zana FIFA lehkha rawn thawnah hian player-in vote an neih chu an pawm loh thu te, U-17 World Cup thlen tur tihbo theih a nih thute an ziak tel.

He mi tuk, August 7 hian SC hmaah COA chuan FIFA thu an zawm tur thute an sawi rualin FIFA hnena zualkoah leh SC leh COA thutlukna tibuaiah Patel chu an puh zui a, SC rorelna kalha hma laah Patel chu puhin a lakah leh State FA aiawh pasarihte lakah SC thupek bawhchhiat (contempt of court)thubuai an thehlut zui bawk a ni.

COA chuan a hmaa SC-a an thehluh tawh constitution kalphung angin inthlanna kalpui turin hma an la zui zel a; hetihlai hian kum 12 chhung AIFF hruaitu lo ni tawh Subrata Dutta (West Bengal) leh Larsing Ming (Meghalaya) te chu inthlanna chuh thei lo leh vote nei lo turin August 13 khan an hnawl zui bawk a ni.

FIFA an lo lang ta
Hetiang boruak karah hian football thuneitu sang FIFA chuan, "Football inrelbawlnaah pawn lam mi an inrawlh e," tiin Thawhṭanni zan zanlai pelh khan AIFF chu a rawn hrem ta a, hei hian India ram media chu a luah khat rang hle a ni.

FIFA hian AIFF hi hrem hrim hrim emaw, FIFA Under 17 Women's World Cup chhuhsak hrim hrim hi a tum niin a lang lo a, an lehkhaah chuan zawm tur fel fai tak an rawn ziak lang nghal.

FIFA secretary general Fatma Samoura-i'n a lehkhaa a ziah lanah chuan FIFA hian COA leh an hnuhma zawng zawng thai reh an phût a, AIFF chu amaha inrelbawl tura chhuah zalen (COA leh SC thunun loh) an phût a, AIFF general body (state FA kal khawm) pawmpui thlap AIFF constitution anga kalpui an phût tel bawk - hengte hi a thlen theih chuan FIFA hian AIFF a hremna hi a hlip thei dawn a ni.