Tualchhung boxing inelna lian leh ngaihhlut hlawh - Zudio LPS Pro Fight chu Zirtawpni zan khan a hmawr bawk a ni a, champion lai zingah Laldinsanga chauhin a title kawl lai a humhim thei a ni.

LPS Arena, Falkland Venga in hnekah Dinsanga hian welterweight champion nihna a huma, inelna dangah - Lallawmawma (welterweight), Lalkhawngaiha (welterweight) leh F. Lalthanliana Jr (middleweight) te an champion thung.

Welterweight

Lallawmawma (Tuipui) chuan a khingpui, champion lai ni bawk Lalruatzela Hauzel (Mission Veng) lakah unanimous decision (40-36, 39-37, 39-37) in hnehna a chang a, Pro Fight a hmachhawn hmasak berah a champion nghal.

Lawma hian tun hmain National Games-ah silver medal a lo la tawh, a tawnhriat neih hi a chhawr ṭangkai ṭhin hle. A kut tum vei lam a hmang thiam em em a, a ding lama hlauhawm tho bawk - a thiam miau avangin inhnekah chungnungin title a lak thlengin derthawng loin a bitum a hneh vek.

Tuipui boxer zinga Lawma hi Pro Fight-a champion thei pangana niin - Laldinmawia, HC Johnkenty Vanhlimpuia, Laldingliana leh Lalrinngheta hnung a zui. Kum 2023 welterweight champion Ruatzela erawhin a vawi khat nan title humhim a tumna a puitling zo lo.

Lightweight

Kum 18 mi chauh ni chungin Lalkhawngaiha a champion - Venghlui rawlthar hian Pro Fight a hmachhawn vawi khatna a ni a, title inchuhnaah a khingpui C. Lalhruaitluanga (Cherhlun) chu unanimous decision (40-36, 39-37, 40-36) in a hneh.

Khawngaiha hian inelna neih chhungin nasa takin hma a sawn tih a inhnek danah hmuh theih a ni, awlsam taka chak erawh a ni bik lo - a khingpui Lalhruaitluanga'an na tak taka a hnek karah a lo bei let thiam tlat a, a hunah tak point a hmu ṭhin.

A phu ang ngeiin Khawngaiha hi GIG Motors Fighter of the Night-a thlan a ni a, KT Enterprise Promising Boxer-a thlan a ni bawk. Hruaia erawh a vanduai chhunzawm, nikum khan title inchuhnaah HC Lalramfela lakah a vanduai zawk a lo ni tawh bawk.

Flyweight

Lalrinngheta'n kum thum chhungin LPS Pro Fight weight hrang pathum a khel a, vawi hnih a champion. Tupui boxer hian kuminah flyweight champion ni turin Vanlalenkawltira (Dinthar Champhai) chu unanimous decision (39-37, 39-37, 39-37) in a hneh a ni.

Ringheta hi Tuipui boxer zinga vawi khat aia tam Pro Fight title la thei pahnihna leh weight hrang pahniha champion thei pahnihna a ni nghal a, weight hrang pahnih aṭanga vawi nga champion tawh HC Johnkenty Vanhlimpuia erawh a la pha lo deuh.

Kum 2022 khan bantamweight-ah a lo champion tawh a, nikum khan lightweight khelin a thleng sang tawk lo. Kuminah erawh flyweight khelin a hma a ding a piang a hneh vek a, sulhnu ṭha leh chhinchhiah tlak a hnutchhiah ta a ni.

Middleweight

Nikum lama champion ni phak lo F. Lalthanliana Jr hun a inherchhuak ve ta, a vawi khat nana Pro Fight champion ni turin Electric Veng, Lunglei boxer hian a khingpui, champion lai ni bawk C. Lalhruaitluanga (Chawngtlai) lakah majority decsion (38-38, 39-37, 39-37) in hnehna a chang.

Thanliana hian kum 2023 khan Pro Fight a khel tawh a, a duhthusam a thleng nghal mai lo. Kuminah nasa taka hmasawin title fight hma hian boxer ṭha John Lalruatsanga leh 2019 middleweight champion C. Lalduhawm a zawnin a hneh.

Inrintawkna sang tak nen Chawngtlai boxer Hruaia a hmachhawn zui a, inhnek tir aṭanga tawp thlengin harsatna lian tham a tawk lo. A tawp lamah Hruaia tho kang ve leh mah se, a tir lama a chet fuh tawk lohna chuan a title a hloh tir ta a ni.

Bantamweight

Hmanni lawka WBC Youth bantamweight champion ni thei Laldinsanga'n tualchung inelna LPS Pro Fight lamah a title kawl lai humhim turin fiahna a hmachhawn zui nghal a, Ramthar, Lunglei tlangval hian Omega Lalramdina (East Kulikawn) chu unanimous decision (39-37, 39-37, 39-37) in a hneh.

Round li an inhnek chhungin Dinsanga'n inhnek a thunun thei bik lo, chutih rualin point hmu turin a hnek chhuak tam a, amah a inveng thiam bawk - fimkhur tak chungin a khel a, a tawpah a vannei zawkah a ṭang ta a ni.

Ramthar Lunglei boxer hi champion lai zinga title humhim awm chhun niin vawi thum a zawnin KT Enterprise Best Boxer atan thlan a ni a, vawi thum champion thei 10-na niin, tualchhung boxing inelna lianah hian hriatreng a hlawh tawh ang.