Aizawl Municipal Corporation (AMC) mayor Lalrinenga Sailo chuan, eptu corporator-te'n AMC sorkar an puhna hrang hrangte chu thu belhchian dâwl lo a nih thu a sawi a; Bawngkawn-Durtlang kawnga protected area huam chhunga in sakte chu ṭhiahsak tura ruahman mek a nih thu a sawi bawk.

Lalrinenga Sailo chuan, AMC sorkar-in Board of Corporators (BoC) rorel an palzût anga eptute'n an puh chungchangah, "Puhmawhnate hi thu belhchian dâwl lo a ni. Thil an hriat loh vang a ni. BoC thutlukna hi tihhlawhtlin zel a ni a... Central aṭanga sum kan dawn tur state sorkarin a tihkhawtlai vanga ward fund sem theih loh tlem azawng tih loh chu ward fund release vek a ni tawh," a ti.

Bawngkawn-Durtlang kawnga Haflong chhaka filling station (petrol pump) siamna tur lei laih chungchangah Mayor chuan, lei laitu chu H Zodinsangi, Zotlang, Aizawl a nih thu te, Geology & Mining aṭangin kum 2017-ah laih phalna a neih tawh thu te, District Magistrate aṭangin NoC a neih thu te, BRTF aṭangin kawngpui kam hman phalnate a neih thu a tarlang.

Lalrinenga Sailo chuan, H Zodinsangi chuan April 24, 2023 khan lei laih phalna AMC-ah a dil tih sawiin, "Geologic Review Board (GRB) meeting vawi 31-na leh 32-nain uluk takin a ngaihtuah a, retaining structure ṭha zawk duang turin diltu a hriattir a. GRB meeting vawi 33-na, May 31, 2023-ah pawm a ni a, July 3, 2023 khan phalna pek a ni," a ti. Zawhna chhangin Mayor chuan, "GRB-in leimin hlauhawm lian tak a awma an ngaih loh vangin lei laih phalna pek a ni," a ti bawk.

Bawngkawn-Durtlang kawnga protected area huam chhunga in sak lai AMC-in stay order a pe chunga sak chhunzawm zel a nih chungchanga AMC hmalak tum dan zawhna chhangin Lalrinenga Sailo chuan, "Demolish (ṭhiah) tura ruahmanna kalpui mek a ni," a ti a; AMC Commissioner-in magistrate power a neih thu leh, protected area huam chhunga in sak dangte pawh an hriat thu a sawi.

Mayor Lalrinenga Sailo chuan, property tax lut aṭanga mipui tana hman leh tur 80% chungchang sawiin, "Property tax hi corporator kaltlanga sem chhuah tur tih a awm lo a, amaherawhchu, ruling party induhsak bikna awm loin corporator ward fund-ah inang tlang veka sem a ni ṭhin," a ti a; kum 2023-24 property tax 80% cheng nuai 480 aṭangin nuai 285 chu corporator tin hnenah Rs 15,00,000 ṭheuhin pek a ni a, a bâk nuai 164.5 chu AMC Multi Complex, Tuikual South atan hman a nih thu a sawi.

Aizawl Mayor chuan, AMC-in khauh takin rorelna leh dan kalpui dawn se, mipuiin an zo ang em tih chu ngaihtuah tham a nih thu a sawi a, "Inhriatthiamna nen Aizawl hi enkawl a ṭul. Dan hi eng ang takin nge kalpui ila ṭha ang tih hriatthiam a har. Khauh taka kal hi a ṭha berin kan hre lo," a ti.

AMC hmalaknaah mipui duhkhawp lohna a awm tih an hriat thu sawiin Mayor chuan, "Aizawl khawpui enkawlnaah hian kan hneh lo a ni tih kan pha lo. Thawktu kan indaih lo em em a, post ruak 50% chuang a awm a, state sorkar hian min thuam chak a ngai," a ti a; AMC chu state sorkarin hmang ṭangkai se an duh thu a sawi.