Chief minister Laduhoma chuan August 1, Ningani khan New Delhi-ah Union Home minister Amit Shah a kâwm a; Aizawl khawpui chhunga awm Assam Rifles battalion sawn chhuah chungchang leh ráltlân chungchang an sawi dun.
Sorkar thuchhuah tarlan danin, CM Lalduhoma leh Amit Shah-te chuan Aizawl aṭanga AR battalion sawn chhuah chungchangah, AR-in memorandum of understanding (MoU) tur an peih har avangin hmalakna a khawtlai thu an sawi. Lalduhoma chuan, AR leh Mizoram sorkar ngaihdanah inhmu rem lo lai a awm a nih chuan inpawh taka sawiho an inpeih thu a sawi a ni.
Amit Shah chuan, AR insawn dan turah Ministry of Home Affairs (MHA) aṭangin officer lian pahnih Aizawla a rawn tirh dawn thu a sawi a, "Anni hoin Aizawlah AR lamte nen lo sawi dun leh u la," tiin, hmalak zel dan tur a ruahman dan a sawi a; AR-te chu Zokhawsangah a tahtawla an chhuah phei a ṭul tur thu pawh a sawi bawk.
Mizorama râltlân awmte chungchangah CM Lalduhoma chuan, raltlante tana sorkar laipuiin tun hnaia cheng vbc. 10 a rawn pek avangin a lawm thu a sawi a, "Manipur harsatna tawhah hian Home Ministry leh Manipur tlangmi mipuite aiawh ITLF hruaitute'n inbiakna nei thei se a ṭhain ka hria," a ti a; Manipur chief minister N Biren Singh-a'n Imphal-a zin tura a sawm thu leh tihhlawhtlin a duh thu a sawi.
Home minister Amit Shah chuan, Cyclone Remal-in Mizorama chhiatna a thlen dan a hmuna endiktu central team report chu Finance lamah a la awm thu a sawi a, "A rang lamin kan lo ngaihven ang a, chhawmdawlna sum pawh eng emaw zat kan rawn pe ang che u," a ti.
CM Lalduhoma hian August 1 vek khan DoNER minister Jyotiraditya Scindia pawh a kâwm a, Serchhip District Hospital sak dan tur te, Mizorama oil palm chíngtute chungchang leh Ministry of DoNER hnuaia Mizoramin project a nghah mekte a sawipui.
Mizorama oil palm chíngtute'n hlâwk zawka an thar theih nan Mizoramah samadhan centre dah ve ni se a duh thu sawiin Lalduhoma chuan, "Huan neitute mamawh tui, leiṭha leh link road-te ti ṭha ila, tuna an thar mek dan hectare khata metric ton 7 aṭangin metric ton 15 vel tal an thar chhoh theih dan tur dappui ni se," a ti a; Mizoramah oil palm thlitfimna (refinery) din law law ṭha a tih thu a sawi.
Jyotiraditya Scindia chuan, DoNER ministry-ah Mizoramin a thehluh project inchiah (pending) mek 93 a awm a, chu'ngte chu cheng vbc. 1,716 vel hû a nih thu leh project inchiah rei zual phei chu kum 24-a upa a nih tawh thu a sawi a, "Project inchiah rei tawh tam tak, tuna kalpui atana fuh tawh lote hi project tharin rawn thlak u la, ka lo pawmsak ang che u," a ti.
Chief Minister hi August 1 zan khan Information & Broadcasting director Tapan Deka nen Mizoram House-ah an inkawm a, Mizorama hmalak dan tur an sawi dun. Japan International Cooperation Agency hotute leh Kaladan Multi Modal Transit Transport Project contractor-te pawh koin, an hnathawh mek leh hmachhawpte a sawipui bawk.
